Որքանո՞վ է ճիշտ, որ գործող նախագահը կոնկրետ ազդեցություն է ունենում դատարանի վրա. Նիկոլ Փաշինյանը` Ռոբերտ Քոչարյանի խափանման միջոցը փոխելու Բակո Սահակյանի միջնորդության մասին
ՀՀ վարչապետ Նիկոլ Փաշինյանը Շանթ հեռուստաընկերության եթերում անդրադարձել է այն հարցին, թե արդյոք Արցախի և Հայաստանի միջև հակասություններն սկսել են այն ժամանակ, երբ Արցախի նախագահ Բակո Սահակյանը եկել է Հայաստան և միջնորդել ՀՀ երկրորդ նախագահ Ռոբերտ Քոչարյանի համար:
«Ի՞նչ հակասությունների մասին է խոսքը, այն ինչ կա, դրանց մասին խոսվել է հրապարակային: Այստեղ խնդիրը բարոյական առումով կարող է լինել հասկանալի, բայց քաղաքական առումով` պետք է ճիշտ գնահատել: Որքանո՞վ է ճիշտ, որ գործող նախագահը կոնկրետ ազդեցություն է ունենում դատարանի վրա: Այսինքն՝ գործող նախագահը, ով ունի ուժային լծակներ, հատուկ ծառայություններ և այդպես շարունակ, ուղղակի այսպիսի միջամտություն է ունենում դատական գործընթացին, որքանո՞վ է սա ընդունելի:
Դատական գործընթացում, դատավորը ամենաբարձր կարգավիճակ ունեցող մարդն է և այդպես պետք է լինի: Պատկերացրեք դատական նիստ է տեղի ունենում, որտեղ դատական նիստերի դահլիճում ներկա է շատ ավելի բարձր կարգավիճակ ունեցող մարդ և այդ բարձր կարգավիճակ ունեցող մարդն ասում է դատավորին՝ միջնորդում ենք, որ կայացնեք այսպիսի որոշում: Ինչքանո՞վ կարող ենք այսպիսի պայմաններում մենք խոսել օբյեկտիվ դատավարության հնարավորության մասին»,- ընդգծել է վարչապետը:
Հիշեցնենք, որ Արցախի հանրապետության պաշտոնաթող նախագահ Արկադի Ղուկասյանը և նախագահ Բակո Սահակյանը միջնորդել էին, որ ՀՀ երկրորդ նախագահ Ռոբերտ Քոչարյանի խափանման միջոցը փոխվի: