Вольга Кавалькова: Гэты дакумент трэба цалкам адмяніць
Сустаршыня аргкамітэта па стварэнні партыі “Беларуская Хрысціянская Дэмакратыя” Вольга Кавалькова пракаментавала адказ міністра ўнутраных спраў Беларусі Ігара Шуневіча адносна аплаты за паслугі сілавікоў пры правядзенні рэлігійных масавых мерапрыемстваў.
Як паведамлялася, 20 мая Канферэнцыя Каталіцкіх Біскупаў у Беларусі атрымала адказ міністра ўнутраных спраў Рэспублікі Беларусь Ігара Шуневіча адносна аплатаў за паслугі спецыяльных службаў пры правядзенні масавых мерапрыемстваў.
У адказе сказана, што дзеянне вышэйзгаданай пастановы не распаўсюджваецца на рэлігійныя мерапрыемствы, хаця ўдакладняецца, што гаворка ідзе пра ўсе рэлігійныя мерапрыемствы, якія адбываюцца ў культавых будынках, пабудовах і на тэрыторыях, якія да іх адносяцца, у іншых месцах, прадастаўленых рэлігійным арганізацыям для гэтых мэтаў, у месцах пілігрымак, на могілках, у крэматорыях або па рашэнні выканаўчых і распарадчых органаў улады.
Вольга Кавалькова: Шчыра рада, што ёсць такі адказ, але трэба дамагацца, каб дакумент адмянілі цалкам для ўсіх людзей, якія хочуць рэалізоўваць сваё права на мірныя сходы, што замацавана ў Канстытуцыі. І тое, што мы ладзім акцыі ў іншым фармаце, не моцна адрозніваецца ад рэлігійных мерапрыемстваў. Мяркую, трэба працягваць кампанію па адмене пастановы.
РР: Вас аштрафавалі за тое, што не аплацілі працу міліцыі падчас акцый, якія арганізоўвалі.
Вольга Кавалькова: Зараз пададзена скарга на рашэнне суда, але пакуль адказа няма наконт таго, калі будзе разгляд.
РР: Калі ў арганізатараў няма грошай на аплату паслуг міліцыі, можа не варта тады і праводзіць акцыі?
Вольга Кавалькова: Прынамсі ўлады робяць усё, каб мы адмовіліся ад правядзення мерапрыемстваў у любым фармаце – санкцыянаваным альбо не. Калі атрымліваем дазвол на акцыю, то вымушаны плаціць міліцыі. Калі няма дазволу, то грошы спаганяюць праз вялікія штрафы.
Мне падаецца, што трэба разгарнуць вялікую грамадзянскую кампанію. Зараз мы збіраем подпісы пад петыцыяй за адмену пастановы, а затым будзем звяртацца ў Канстытуцыйны суд, каб той прызнаў дакумент незаконным. Таму ў першую чаргу трэба выкарыстоўваць заканадаўчыя магчымасці, але не варта адмаўляцца і ад свайго права на мірныя сходы. Нельга маўчаць у такой сітуацыі.
Кастусь Заблоцкі, Беларускае Радыё Рацыя
Фота: Krynica.info