Алматы облысында өлі табылған қыздың туыстары марқұмның өз-өзіне қол салғанына сенбей отыр
Алматы облысында асылған күйі табылған қыздың туыстары марқұмның өз-өзіне қол салғанына сенбей отыр, - деп хабарлайды КТК телеарнасы.
Еске салайық, бір апта бұрын жоғалған 18 жастағы студент қыз өлі табылған еді. Үйінен қаладағы оқуына қарай шығып кеткен Айгүл Амангелдінің мәйіті бір аптадан бері тауда жатқан көрінеді. Оқиға орнын тексерген тәртіп сақшылары ол өз-өзін өлтірді деген болжам жасап отыр. Себебі асылған күйі табылған қыздың денесінде бірде-бір зорлық белгілері болмай шыққан. Дегенмен қыздың ауылдастары полициямен келіспейді.
Олардың айтуынша, қалаға қатынап оқып жүрген студентке әлдебіреулер қиянат жасаған болуы мүмкін. Талғар ауданындағы өзі тұрған Белбұлақ ауылынан Алматыға емтихан тапсыруға шығып кеткен қыздың денесі бір аптадан соң таудан табылды. Полицияның алдын ала мәліметіне қарағанда, Айгүл Амангелді онда өзі барып асылған.
"Зорлық-зомбылық белгілері анықталмаған. Алдын ала болжам бойынша, қыз өз-өзіне қол жұмсаған", - дейді Алматы облысы полиция департаментінің ресми өкілі Ернар Сайділдин.
Айгүлдің бұрынғы сынып жетекшісі Базаргүл Айнақұлова болса қыздың өзіне қол жұмсайды дегенге сенбейтінін айтады.
"Өзіне қол жұмсайды дегенге мен сенбеймін! Жабулы қазан жабулы күйінде қалмасын деп ойлаймын. Өйткені бір адам болу керек бұл жерде! Қандай адам екенін нақтылап анықтап шешсе екен деймін. Тауып, өзінің жазасын алса деймін", - дейді Базаргүл Айнақұлова.
Мектептегі мұғалімдердің айтуынша, қыз өте тәрбиелі болған. Сабағын 4 пен 5-ке оқып, қатарластарының алды болған. Базаргүл Айнақұлова соңғы рет Айгүлмен өткен айда ғана сөйлесіпті. Үнемі сырын бөлісіп жүретін сынып жетекшісіне қыз оқуы ұнайтынын да айтқан екен.