25 апрель (шимбә). Рәҗәб аеның 6нчы көне. 8нче Ай тәүлеге. Ай Арыслан йолдызлыгында, 9.44 сәгатьтә калка, 0.48 сәгатьтә бата. 1нче фаза. Көн озынлыгы 14.53 сәгать.
Бүген бигрәк тә ут белән эш иткәндә саклык сорала. Ризык җиңел үзләштерелүчән булырга тиеш. Ашказаны, бизләр системасы, кул, җилкә зәгыйфь. Хисләре керләнгән кешеләрнең колаклары авыртырга мөмкин. Бу атнада күзләрне саклау мөһим. 25-27 апрельдә бернәрсә чәчәргә, утыртырга, күчереп утыртырга ярамый.
Ай һәм һава торышы
Әгәр Ай тонык, кырыйлары зәңгәрсуланып тора икән, яңгыр явачак. Яңа Ай туган көнне һәм Айның өченче көнендә көньяктан җил иссә, фазалар алмашканга кадәр тотрыксыз һава торышы күзәтеләчәк. Айдагы кара нурлар Җиргә кадәр сузылса, һава бозылачак. Ай тирәсендәге төрле төсләрдәге түгәрәк тиздән җилле яңгыр башлануын хәбәр итә.
26 апрель (якшәмбе). Рәҗәб аеның 7нче көне. 9нчы Ай тәүлеге. Ай Арыслан йолдызлыгында, 10.48 сәгатьтә калка, 1.20 сәгатьтә бата. 2нче фаза. Көн озынлыгы 14.58 сәгать.
Авыр энергетикалы көн, алдашу, ялганга бай. Хәтта сыйфатлы ризыклар белән дә агулану ихтималы бар. Күп аралашу хупланмый. Фикерләрне тупларга, үзегезне үпкәләткән кешеләрне кичерергә кирәк. Үпкә, ашказаны зәгыйфь. Кан басымы күтәрелергә, йөрәк, арка яки баш авыртырга мөмкин.
Сөт - күзгә дәва
Кайвакыт күзләр нык арый, авырта башлый. Иртән йокыдан уянганда авырту бетә, ә менә арыганлык кимеми. Күзне сак кына җылымса су белән юарга кирәк. Сөт йогышсызландыра, ялкынсынуны баса. Күз кабакларының шешенкелеген бетерү өчен, мамык тампоннарны сөттә чылатып, күзгә 5-10 минутка куеп тору җитә.
27 апрель (дүшәмбе). Рәҗәб аеның 8нче көне. 10нчы Ай тәүлеге. Ай Арыслан йолдызлыгында, 11.53 сәгатьтә калка, 1.48 сәгатьтә бата. 2нче фаза. Көн озынлыгы 15.02 сәгать.
Нәсел, гаилә, гореф-гадәтләр белән бәйле көн. Ял итү, йокы туйдыру, гаиләне ныгыту өчен иң шәп вакыт. Йорт төзи башларга була. Әйләнә-тирәдәгеләргә игътибарлырак булу сорала. Сизү әгъзалары, йөрәк-кан тамырлары системасы, сөякләр зәгыйфь.
Стаканнан чәй эчмә!
Чәйне нинди савыттан эчү дә әһәмиятле икән. Чынаяктан эчелгән чәй һәрвакыт байлык теләп тора. Бокалдан эчкәндә, чыгымнар даими булачак. Касәдән эчелгән чәй – зур керемнәргә. Стаканнан эчү – ярлылык һәм бөлүгә. Шар формасындагы чәй чәйнегеннән салып эчү – һәрвакыт тотрыклы һәм яхшы кәефкә. Озынча чәйнектә чәй пешергәндә, начар энергиядән арыну озакка барачак. Кечкенә чәйнектән эчү фикерне тиз туплауга, тиз төшенүгә ярдәм итә. Бик зур чәйнектә пешерелгән чәй исә фикерне тарата.
28 апрель (сишәмбе). Рәҗәб аеның 9нчы көне. 11нче Ай тәүлеге. Ай Кыз йолдызлыгында, 12.59 сәгатьтә калка, 2.12 сәгатьтә бата. 2нче фаза. Көн озынлыгы 15.06 сәгать.
Үзгәрү, сафлык, катгыйлык көне. Һәр эштә дә сак һәм игътибарлы булу сорала. Башланган эшне ахырына җиткерергә кирәк. Бу көннең энергетик куәте бик зур, кешедә искиткеч табигый көч уянырга мөмкин. Арып-талганчы эшләргә ярамый. Сизү әгъзалары, йөрәк, умырткалык зәгыйфь. 28-30 апрельдә берьеллык чәчәкләр чәчелә, Шабо канәфере, хуш исле борчак үсентеләре бакчага күчереп утыртыла, пион, ирис, флокс, хризантема кебек күпьеллык чәчәкләр, тамырдан бүленеп, күчерелә.
Иммунитетны ныгыту
1әр аш кашыгы ромашка чәчәге, гөлҗимеш җиләге, юкә чәчәген 2 стакан кайнар суда 1 сәгать төнәтәләр, сөзәләр, көненә 4 тапкыр, ашар алдыннан, җылы килеш яртышар стакан эчәләр. 2 аш кашыгы вакланган кура җиләге ботагын 1 стакан кайнар суга салып, сүрән утта 5-10 минут пешерәләр, 1 сәгать төнәтәләр, 10 көн буе һәр сәгать саен 2шәр аш кашыгы эчеп торалар.
29 апрель (чәршәмбе). Рәҗәб аеның 10нчы көне. 12нче Ай тәүлеге. Ай Кыз йолдызлыгында, 14.04 сәгатьтә калка, 2.33 сәгатьтә бата. 2нче фаза. Көн озынлыгы 5.11 сәгать.
Шәфкать, сабырлык, мәхәббәт энергиясенә бай көн. Сәламәтлеккә игътибарлы булырга, йөрәккә киеренкелек китермәскә кирәк. Ашкайнату әгъзалары, кан әйләнеше системасы зәгыйфь. Дарулар яхшы үзләштерелә.
Баллы груша, анар суы...
Эч киткәндә, каты грушаны изәләр, 1 аш кашыгы бал кушалар, ач карынга ашап, куе чәй эчәләр. Яисә 30 грамм анар согына шулкадәр үк кайнатып суытылган су кушып, әз-әзләп эчәләр. Яки 10 грамм анар кабыгын 1 стакан кайнар суда 10 минут пешерәләр, суытып сөзәләр, көненә 3 тапкыр, ашаганчы, 1әр аш кашыгы эчәләр. 30 грамм кара карлыганны 1 стакан суда 20-30 минут пешерәләр, суытып, ашар алдыннан, көненә 3-4 тапкыр 1әр аш кашыгы эчәләр. 1 чәй кашыгы вакланган имән кайрысын 2 стакан кайнар суда 5-6 сәгать төнәтәләр, сөзеп, көн дәвамында әз-әзләп эчәләр.
30 апрель (пәнҗешәмбе). Рәҗәб аеның 11нче көне. 13нче Ай тәүлеге. Ай Үлчәү йолдызлыгында, 15.10 сәгатьтә калка, 2.52 сәгатьтә бата. 2нче фаза. Көн озынлыгы 15.15 сәгать.
Үзгәрешләр көне. Үткәннәр турында уйланып, нәтиҗәләр ясау яхшы. Ач торырга ярамый – теләсә нәрсә ашарга була. Аралашу, белем алу файдалы. Йөрәк, тире, кан тамырлары зәгыйфь. Чикләвек ашау файдалы.
1 май (җомга). Рәҗәб аеның 12нче көне. 14нче Ай тәүлеге. Ай Үлчәү йолдызлыгында, 16.17 сәгатьтә калка, 3.12 сәгатьтә бата. 2нче фаза. Көн озынлыгы 15.19 сәгать.
Иң әһәмиятле эшләрне башлау өчен уңайлы көн. Бүген башланган эш бик яхшы тәмамланачак. Теләсә нинди вак-төяккә игътибарлы булу сорала. Ач тору файдалы. Эчәклек һәм тирене чистарту уңай нәтиҗә бирә.
Солы кесәле
Эчәклекне чистарту өчен, бик файдалы кесәл ясап ашарга була. 100 грамм солы ярмасын 1,5 стакан кайнар суга салып болгаталар да, томалап куялар. 1 тәүлектән соң марля аша сөзәләр, кара икмәк катысы салып, 1 тәүлеккә җылы урынга куялар. Аннары куе массага әйләнгәнче болгата-болгата кайнаталар, кайнар килеш тәлинкәләргә бүлеп суыталар. Әзер кесәлне кисәкләргә бүлгәләп, үсемлек маенда кыздырылган суган белән ашыйлар.
