Пенсионерлар күбесенчә “Казан утлары”, “Сөембикә”, “Сәхнә” журналларын, “Вечерняя Казань” гәҗитен укыйлар, өйгә дә китаплар алалар. Мәктәп балалары һәм студентлар уку программасына кагылышлы китаплар сорый. Балалары “Салават күпере”, “Классная девчонка” журналларын, “Сабантуй” газетасын кызыксынып укыйлар. Китапханәдә интернет белән компьютерлар бар. Бигрәк тә студентлар бу мөмкинлектән файдаланалар, реферат, курс эшләре язганда мәгълүматлар эзлиләр. Ә бакча балалары әкият китаплары алырга килә. Бирегә матур рәсемле әкият китаплары еш кайта икән.
–Безнең фондта уналты мең китап бар. Соңгы вакытта Зифа Кадыйрова, Гомәр Бәширов, Гариф Ахунов, Туфан Миннуллин, Гадел Кутуй китаплары кайтты. Аларның һәрберсе кызыклы һәм үзенчәлекле. Урта буын вәкилләре Мәдинә Маликова, Зифа Кадыйрова, Фәнис Яруллин әсәрләрен аеруча яратып укыйлар,–ди китапханәче Людмила Савинова. Людмила Зимина, Татьяна Ворошина, Владимир Башев, Игорь Лазерев, Илсур Ахметшин, Геннадий Малышев иң күп укучы пенсионерлар. Сәлимә Гарипова тормыш иптәше белән китапханәдә булган барлык татар китапларын укып чыкканнар. Ә менә Людмила белән Владимир детектив, сугыш турындагы әсәрләрне укырга яраталар икән. Урта буын вәкилләреннән Сергей Волков та күп укучылар рәтендә тора, төрле темалардагы әсәрләр укый.
Китапханәдә татар, рус классикларының китапларыннан тыш чуваш, мари телендәге әсәрләрне дә табарга була.
Гөлназ Зарипова.
Автор фотолары.