Сабан туе көннәре билгеле
Татарстан Президенты вазыйфаларын вакытлыча башкаручы Рөстәм Миңнеханов республикада Сабан туе бәйрәмен үткәрү турында Указ чыгарды.
Татар халкының милли бәйрәмен быел авыл торак пунктларында, район үзәкләрендә 6-7 июньдә, Яр Чаллы һәм Түбән Кама шәһәрләрендә 13 июньдә үткәрү күздә тотыла. Казан шәһәрендә Сабан туе 1 августка билгеләнгән.
25 апрельдә – барыбыз да өмәгә
25 апрель бөтен ил күләмендә шимбә өмәсе дип игълан ителде.
Ул санитар чистарту икеайлыгы кысаларында үткәрелә. Һәр елны апрель азагында әйләнә-тирәне чистарту-төзекләндерү буенча өмә үткәрү – күптәннән килә торган күркәм традиция. Кардан арчылган урам һәм тыкрыкларда, елга буйларында, юл кырыйларында байтак чүп-чар килеп чыга. Күп авылларда инде өмәләрне үткәрә дә башладылар. Май бәйрәмнәренә кадәр авылларыбызны ялт иттереп чистартып куярга кирәк бит. Ә быел бәйрәмнәрнең аеруча зурысын – Бөек Ватан сугышында Җиңүнең 70 еллыгын билгеләп үтәчәкбез.
Бу шимбәдә барыбыз да бердәм рәвештә өмәгә чыгып, яшәгән җиребезне чистартыйк, төзекләндерик, ямьләндерик!
Агачлар утыртыйк
24 апрельдә районыбызда "Урман утырту көне" үткәрелә.
Әйләнә-тирәне яшелләндерү, табигатьне саклау максатындагы әлеге акция республика күләмендә оештырыла. Бу көнне авылларда, парк һәм скверларда, урманнарда меңәрләгән төп ылыслы һәм яфраклы агачлар утыртылачак. Акциягә һәркем кушылсын, районыбызны яшелләндерүгә үз өлешен кертсен иде. Агач үсентеләрен урман хуҗалыгының Базарлы Матак участогында алырга була.
Бәйрәм алды бәйгесе
Авыллардагы һәйкәл һәм обелискларны төзекләндерү, тирә-юньнәрен ямьләндерү буенча район бәйгесе игълан ителде.
Бөек Җиңүнең 70 еллыгын билгеләп үтәргә санаулы көннәр калды. Күп кенә авыл җирлекләре башкарма комитетлары үз территорияләрендә Бөек Ватан сугышында катнашкан якташлары хөрмәтенә куелган обелиск, һәйкәлләрне ремонтлап, тирәләрен төзекләндереп, матурайтып та куйдылар. Кайбер авылларда әлеге эш дәвам итә.
Муниципаль район башкарма комитеты иң төзек һәйкәл һәм обелискка конкурс игълан итте. Җиңүче авыл җирлекләре Диплом һәм кыйммәтле бүләкләргә ия булачак. Нәтиҗәләр 1 Май бәйрәме көннәрендә чыгарылачак.
Иң осталар чыгыш ясый
24 апрельдә Бөек Җиңүнең 70 еллыгына һәм Әдәбият елына багышланган район фестиваленең гала-концерты була.
Анда үзешчән сәнгатьтә катнашучыларның иң уңышлы номерлары тәкъдим ителәчәк. Концерт балалар иҗат йортында уза. Рәхим итегез!
Депутатлар игътибарына
23 апрельдә муниципаль район советының чираттагы утырышы була.
Анда районда конфессияара һәм милләтара мөнәсәбәтләр турында, район бюджетына үзгәрешләр кертү турында һәм башка мәсьәләләр каралачак.
Утырыш "Колос" кинотеатрында була, сәгать 10 да башлана.
Май бәйрәмнәрендә – җиде көн ял
Май бәйрәмнәрендә татарстанлыларны җиде көн ял көтә.
Яз һәм хезмәт бәйрәме яллары дүрт көнгә (1,2,3,4 май) сузылачак. 1 Май – бәйрәм, 2,3 май – шимбә, якшәмбе яллары. 4 майга исә быел якшәмбегә туры килгән 4 гыйнвар ялы күчә. Җиңү бәйрәмендә өч көн (9,10,11 май) ял итәчәкбез.