Թուրքական օդուժը գործողություն է իրականացրել Իրաքի հյուսիսում
Թուրքական ԶՈւ-ի օդուժը գործողություն է իրականացրել Իրաքի հյուսիսում՝ թիրախավորելով «Քրդստանի աշխատավորական կուսակցություն» խմբավորման զինյալների դիրքերը, այս մասին գրում է թուրքական «Միլլիյեթ» պարբերականը:
Թուրքիայի պաշտպանության նախարարության տվյալներով՝ իրաքյան Զափ, Սինափ-Հաֆթանին և Հարքուք շրջաններում իրականացված հրթիռակոծման ժամանակ սպանվել է նվազագույնը 6 քուրդ զինյալ, ոչնչացվել են գրոհայինների զենքի պահեստներ ու թաքստոցներ:
Նշենք, որ քրդական կողմը որևէ կերպ չի մեկնաբանել տարածված տեղեկատվությունը:
Հիշեցնենք, որ ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:
Կազմակերպությունը 1978 թվականին հիմնադրել է Աբդուլլահ Օջալանը: