Պաշտոնյաների կողմից պարգևատրումների տեսքով վարձատրությունը վկայություն է ՀՀ-ում կոռուպցիայի իրողության մասին ամենաբարձր մակարդակով. «Երկիր ծիրանի»
Երևանի քաղաքապետարանի աշխատակիցներին պարգևատրումների տեսքով վարձատրելու Հայկ Մարությանի, իսկ մարզպետների կողմից իրենց և իրենց աշխատակիցներին պարգևատրումների տեսքով վարձատրությունը վկայություն է Հայստանում կոռուպցիայի իրողության մասին ամենաբարձր մակարդակով:
Այս մասին ասված է «Երկիր ծիրանի» կուսակցության տարածած հաղորդագրության մեջ, որը ներկայացնում ենք ստորև.
«Հանրային իշխանությունների ներկայացուցիչների վարձատրությունը հանրային գումարներից` պետական բյուջեից, չի կարող լինել կամայական և առանց oրենքով նախատեսված հիմքի: Ներկայիս գործադիր իշխանության ղեկավար Նիկոլ Փաշինյանը հայտարարել էր, որ իբրև Հայաստանում կոռուպցիա չկա, մինչդեռ նրա կողմից նշանակված մարզպետները և նրա կողմից ըստ էության նշանակված Երևանի քաղաքապետը կատարել են գործողություններ, որոնք բնութագրվում են որպես կոռուպցիոն գործարքներ:
Թավշյա կոռուպցիայի երկու դեպքերի նկարագրությունը, որոնցից մեկը առընչվում է Երևանի քաղաքապետ Հայկ Մարությանի կողմից կատարված գործողությանը` քաղաքապետարանի աշխատակիցներին պարգևատրումների տեսքով վարձատրելուն, իսկ երկրորդը մարզպետների կողմից իրենց և իրենց աշխատակիցներին պարգևատրումների տեսքով վարձատրությանը վկայություն է Հայստանում կոռուպցիայի իրողության մասին ամենաբարձր մակարդակով:
Հայկ Մարությանի դեպքում դեռ պարզ չէ նա ում է պարգևատրել, որքան և ինչ սկզբունքով (Հայկ Մարությանը պարգևատրված անձանց անունները, նրանց տրված գումարի չափը գաղտնի է պահում): Հայկ Մարությանի կողմից կատարված գործողության իրավակարգավորումը պետք է տեղի ունենար Համայնքային ծառայության մասին ՀՀ օրենքով և Երևան քաղաքում տեղական ինքնակառավարման մասին ՀՀ օրենքով, մինչդեռ այս ընթացակարգերի պահպանման վերաբերյալ Հայկ Մարությանը ապացույց չի ներկայացրել: Նրա կողմից կատարված պարգևատրումների վերաբերյալ օրենքով նախատեսված ինչ չափանիշ է կիրառվել պարզ չէ:
Երկրորդ դեպքում` մարզպետների գործողությունները որպեսզի կրեն օրինական բնույթ. նրանք պետք է` պետական պաշտոն զբաղեցնող անձին (հանրային ծառայողին) պետական բյուջեից` այսինքն հանրային միջոցներից տրամադրեն պարգևատրում օրենքով նախատասված հիմքով: Տվյալ դեպքում մարզպետները պետք է ղեկավարվեին Պետական պաշտոններ և պետական ծառայության պաշտոններ զբաղեցնող անձանց վարձատրության մասին ՀՀ օրենքի 3-րդ հոդվածի 3-րդ կետի պահանջներով, որը սահմանում է հետևյալը. Պարգևատրումը միանվագ վճար է, որը պետական պաշտոն և պետական ծառայության պաշտոն զբաղեցնող անձին տրվում է ծառայողական գործունեության (կատարողականի) գնահատման և (կամ) հատուկ առաջադրանքների և (կամ) որակյալ աշխատանքների կատարման համար: Մինչդեռ պարգևատրում ստացած անձանց ծառայողական գործունեության կատարողականի գնահատականը, նրանց կողմից հատուկ առաջադրանքներ և որակյալ գործունեության արդյունքը արձանագրված չէ:
Համաձայն Պետական պաշտոններ և պետական ծառայության պաշտոններ զբաղեցնող անձանց վարձատրության մասին ՀՀ օրենքի 22-րդ հոդվածի 6-րդ կետի՝ Պետական ծառայողը պարգևատրվում է, եթե նրա կատարողականի կիսամյակային գնահատականը կամ կիսամյակային հաշվետվության վերաբերյալ պետական ծառայողի ղեկավարի տված եզրակացությունը դրական է, և նա այդ կիսամյակում աշխատել է վեց ամիս: Մարզպետների կողմից թավշյա կոռուպցիայի հետևանքով պարգևատրում են ստացել անձինք, ովքեր հանրային ծառայության մեջ են եղել մեկ կամ երկու ամիս, այսինք պակաս քան կես տարի` ինչը պահանջում է օրենքը:
Օրինականության սկզբունքի ոտնահարմամբ հանրային գումարների կառավարումը, և նախորդ իշխանության ժամանակ, և այսօր արձանագրում է չարաշահումներ, որը բնութագրվում է, հանրային միջոցների յուրացում` կոռուպցիա, պետության կառավարման բարձր օղակներում:
Ցավալի է, սակայն փաստ, 2018 թվականի ապրիլյան Մեծ Համահայկական ընդվզումից հետո էլ կոռուպցիան Հայաստանում շարունակում մնալ պետական կառավարման բարձր մակարդակում:
«Երկիր Ծիրանի» կուսակցությունը դատապարտում է Նիկոլ Փաշինյանի կառավարման շուրջ 9 ամսյա գործունեությունը և մեղադրում նրան Հայաստանում գործող շուրջ քառորդդարյա բռնապետական համակարգի շարունակականությունը ապահովելու հանցագործության մեջ, որը տեղի է ունենում նաև պետական կառավարման բարձր մարմիններում կոռուպցիոն գործարքների իրականցման միջոցով: