Թրամփն ու Էրդողանը հեռախոսով քննարկել են Սիրիայի հյուսիսում ստեղծված կացությունը
Երկու նախագահների հեռախոսային բանակցությունների մասին հաղորդում են թուրքական աղբյուրները:
Anadolu գործակալությունը՝ մեջբերելով Թուրքիայի նախագահի աշխատակազմի տարածած հաղորդագրությունը, տեղեկացնում է, որ Թրամփն ու Էրդողանը պայմանավորվել են համատեղ ջանքեր գործադրել «Իսլամական պետություն» խմբավորման մնացորդները Սիրիայի տարածքից հեռացնելու ուղղությամբ:
Հեռախոսազրույցի ընթացքում Էրդողանն իր ամերիկացի գործընկերոջը նաև տեղեկացրել է, որ Թուրքիան չի հանդուրժի«Քրդական աշխատավորական կուսակցության» (PKK) կողմից Սիրիայի հյուսիսային շրջանների ապակայունացմանն ուղղված գործողությունները:
Հեռախոսազրույցի առթիվ պաշտոնական հաղորդագրություն է տարածել նաև Սպիտակ տունը:
«Երկու նախագահները պայմանավորվել են Սիրիայի հյուսիսարևելյան շրջանների առթիվ համաձայնեցված լուծում գտնել, որն անվտանգության տեսանկյունից փոխադարձաբար ընդունելի կլինի կողմերի համար», - հայտարարել է Սպիտակ տան խոսնակ Սարա Սանդերսը: