Չինաստանում դպրոցի տնօրենն ամենօրյա պարտադիր մարմնամարզության փոխարեն աշակերտների հետ պարային համար է «բեմադրել» (տեսանյութ)
Չինաստանի դպրոցներից մեկի տնօրենը դպրոցներում ամենօրյա մարզանքներ պարտադրող պետական ծրագիրը յուրովի է իրականացրել՝ դասական մարմնամարզության փոխարեն աշակերտների հետ պարելով: Համացանցի օգտատերերը մտավախություն են հայտնել, որ նա կարող է կորցնել աշխատանքը, գրում է South China Morning Post-ը:
Համացանցում շրջանառվող տեսանյութում երևում է, թե ինչպես է 40-ամյա Չժան Պենֆեյը երեխաների հետ պարում: Դպրոցի տնօրենը պարզաբանել է, որ ո՛չ աշակերտներին, ո՛չ ուսուցիչներին սովորական մարմնամարզությունը հետաքրքիր չէր, և երեխաները երկար ժամանակ անշարժ էին մնում: Արդյունքում նա որոշել է փոփոխություն մտցնել:
Սկզբում ուսուցիչների մի մասը դեմ է եղել, սակայն էներգետիկ երաժշտության տակ նրանք էլ են միացել պարային շարժումներին:
Ամենօրյա մարմնամարզության ծրագիրը երկրի բոլոր դպրոցներում ներմուծվել է 1951թ.: