ოკუპირებულ აფხაზეთში დისლოცირებული რუსული ბაზის სამი სამხედრო მოსამსახურე დაიღუპა და ორი დაშავდა წებელდის პოლიგონის მახლობლად. რუსეთის სამხრეთ სამხედრო ოლქის პრესსამსახურის მიერ დღეს, 21 იანვარს გავრცელებული ინფორმაციით, შემთხვევა 18 იანვარს მოხდა. სამხედრო ოლქის ოფიციალური განცხადების თანახმად, წებელდის მთიანი პოლიგონიდან დისლოკაციის მუდმივი ადგილისკენ მიემართებოდა საბრძოლო ტექნიკის კოლონა, რომლის შემადგენლობაში მყოფი ჯავშანმანქანა ხეობაში გადავარდა. რუსეთის სამხრეთ სამხედრო ოლქის პრესსამსახურის ცნობითვე, სპეციალური კომისია უბედური შემთხვევვის მიზეზებად განიხილავს ტექნიკურ გაუმართაობას და მძღოლის შეცდომას.
