Պարգևատրում ստացել են ոչ թե 22 մարդ, այլ մարզպետարանի բոլոր աշխատակիցները. Հունան Պողոսյանը հերքում է, թե ինքը 1 օրում 2 անգամ պարգևատրել է աշխատակիցներին
Սյունիքի մարզպետ Հունան Պողոսյանը հերքում է մամուլում շրջանառվող լուրերը, թե Սյունիքի մարզպետը մեկ օրում երկու անգամ դրամական պարգևատրմամբ ինքն իրեն խրախուսել է։ Նա Tert.am-ի հետ զրույցում նման, ինչպես ինքը որակեց, սենսացիոն լուրերը, հիմարութուն որակեց՝ նկատելով, որ ինքը ոչ թե երկու անգամ, այլ երկու հոդվածներով, բայց մեկ անգամ է խրախուսել մարզպետարանի աշխատակիցներին:
«Պարգևատրում ստացել է ոչ թե 22 մարդ, այլ Սյունիքի մարզպետարանի բոլոր աշխատակիցներն անխտիր ու հավասարապես՝ պաշտոնային դրույքաչափի 67.16 տոկոսի չափով: Մարզպետարանի պաշտոնական կայքում հրապարակված կարգադրություններին ուղղակի կերպով հղում անողներին և չիմացողներին տեղեկացնենք, որ խրախուսանք կիրառում է տվյալ պաշտոնին նշանակելու իրավասություն ունեցող անձը, հետևաբար, 22 հոգի խրախուսվել է մարզպետի կարգադրությամբ, իսկ մյուսները՝ մարզպետարանի գլխավոր քարտուղարի հրամանով»,- մարամասնեց Պողոսյանը։
Մարզպետը վստահեցրեց, թե գործընթացը օրինականության սահմաններում է, ավելին՝ արվում է տարեվերջին՝ մարզպետարանի ծախսերի արդյունքում ունեցած խնայողությունների հաշվին: Նա տեղեկացրեց, որ Սյունիքի մարզպետարանը 2018 թվականին իր խնայողություններից 8.8 մլն դրամ վերադարձրել է ՀՀ պետական բյուջե։
Հարցին՝ մարզպետարանին ի՞նչ խնդիրներ է հաջողվել լուծել, որ պարգևատրման որոշում է կայացվել, Հունան Պողոսյանը պատասխանեց. «Մարզպետարանն իր աշխատանքները պատշաճ ձևով կատարում է, և մենք անհատապես ենք մոտեցել՝ պարգևատրելով բոլորին։ Ընդ որում` այնպես չէ, որ մարզպետարանի աշխատակիցները կատարում է իրենց աշխատանքային պարտականությունները միայն այսօր, մարդիկ միշտ էլ կատարել են։ Ցանկացած կոլեկտիվում էլ կան մարդիկ, որոնք պարկեշտ կատարել են իրեն աշխատանքը, որոնք պետք է խրախուսվեն և պարգևատրվեն»։