Բյուջեի հաշվին նման շռայլ պարգևավճարներն ընդունելի չեն՝ այն էլ այդքան կարճ ժամանակ աշխատելով. ԼՀԿ խմբակցություն
«Լուսավոր Հայաստան» խմբակցության քարտուղար Գևորգ Գորգիսյանը ԱԺ ճեպազրույցների ժամին տեղին չհամարեց այն դիտարկումները, թե նախընտրական շրջանում ԼՀԿ-ն խուսափում էր խնդիրների մասին բարձրաձայնել և հիմա է միայն բարձրաձայնում:
«Ցանացած խնդրի մասին մենք միշտ բարձրաձայնել ենք»,-ասաց նա և նշեց, որ նաև նախընտրական շրջանում են խոսել մարդու իրավունքների և մնացած այլ խնդիրների մասին, որը հիմա էլ շարունակելու են ներկայացնել: Կուսակցության խոսնակ Անի Սամսոնյանն անդրադարձավ մարզպետների` իրենք իրենց պարգևատրելու գործընթացին, որը բավական աղմուկ է բարձրացրել:
«Եթե հիշում եք, երբ Երևանի քաղաքապետարանում քննարկվում էր պարգևատրումների համար բյուջեի ավելացումը, մենք ասում էինք, որ դա վատ պրակտիկա է, պետք է ավելացնեն աշխատավարձը, և սա սկզբունքային հարց է»,-ասաց նա: Անի Սամսոնյանը շարունակեց, որ այն կարգադրությունները, որ ընդունել են մարզպետները, անընդունելի են՝ հատկապես հաշվի առնելով նրանց աշխատած ժամանակը` 7 ամիս, 2 ամիս և այլն:
«Հանրային պաշտոնյաները չէին կարող ստանալ այդպիսի բարձր դրույքաչափերով պարգևավճարներ, և սա խոսում է այն մասին, որ Երևանի քաղաքապետ Մարությանն օրենքի խախտումով հրաժարվում է քաղաքապետարանում տրված պարգևատրումները հրապարակել` պնդելով, որ երբեք չի հրապարակվել, և մենք ապացուցեցինք, որ հայտարարությունը չի համապատասխանում իրականությանը, և որ նման քայլը փախուստ է, որ չտեսնենք՝ ովքեր, ինչ պաշտոնյաներ ինչ դրույքաչափերով են պարգևավճարներ ստացել»,-ասաց նա:
Անի Սամսոնյանը հույս հայտնեց, որ այս աղմուկից հետո մարզպետները կվերանայեն իրենց մոտեցումները: «Որովհետև բյուջեի հաշվին նման շռայլ պարգևավճարները, այն էլ այդքան կարճ ժամանակ աշխատելով, ընդունելի չէ»,-ասաց նա: Վերջինս խոսեց պարզաբանումներից, թե պարգևավճարները մոտիվացնելու են աշխատողին:
«Բայց միանշանակ է, որ աշխատանք ստանալու համար աշխատողն իրեն գնահատելու է աշխատավարձի չափով և ոչ թե կամայական»,-ասաց նա և հիշեցրեց, որ պարգևավճարների չհրապարկման հարցով իրենք վարչական դատարան են դիմելու: Գևորգ Գորգիսյանը ևս հավելեց, թե նշում են, որ քանի որ կոռուպցիա չկա, և աշխատավարձը ցածր է, և իրենք այդ գործիքը կիրառում են այդ խնդրի համար: «Մեր խմբակցությունում առաջարկվում էր աշխատավարձերը բարձրացնել, թե չէ կամայական կլինի՝ ում պարգևավճարներ տան, և սա կոռուպցիոն դաշտ է ստեղծում»,-ասաց նա: