Грецияда Македония билан эришилган шартномадан норозилар полиция билан тўқнашди (ВИДЕО)

Греция Македония билан эришган келишувга қарши 20 январда Афинида ўтган норозилик митинги полиция билан тўқнашувга айланиб кетди.


Норозилар парламент биносига бостириб киришга ҳаракат қилди ва полициячиларни тошбўрон қила бошлади. Полиция бунинг ортидан тўқмоқлар ва кўздан ёш оқизувчи газ қўллашга мажбур бўлди. Полициячиларнинг 9 нафари жароҳатланган.







2018 йилнинг июнь ойида Македония ва Греция узоқ йиллар давом этган музокаралардан сўнг Македония номини Шимолий Македония деб ўзгартириш тўғрисидаги шартномани имзолаган эди.


Намойишчилар эса Македония деган ном фақат Грецияга мансублигини айтган ҳолда, қўшни давлат номи мутлоқо бошқача тарзда ўзгартирилишини талаб қилаётирлар.


Грециянинг бир вилояти ҳам Македония деб аталиши туфайли, Афина келажакда ҳудудий ихтилоф чиқишининг олдини олиш мақсадида 1991 йилдан бери Македониядан ўз номини алмаштиришни талаб қилиб келаётган эди.


Бу талаб ортидан Македония Европа Иттифоқига ва НАТОга аъзо бўла олмай келаётганди. Мамлакат номининг Шимолий Македония деб ўзгартирилиши муносабати билан бу иттифоқларга қўшилиш учун йўл очилган эди.