Зәй яшьләр эшләре идарәсе 1 майда “Йолдызлык” лагере базасында “Эпоха СССР” дип исемләнгән яшьләр слеты уздырырга әзерләнә. Бу замана яшьләрен СССР чорында яшәгән балалар, яшүсмерләр, яшьләр оешмалары белән таныштыру, патриотик хисләр тәрбияләү максатын күздә тотып үткәрелә. Элекке чордагы оешмалар үрнәгендә кызыклы, формаль булмаган, иҗади мөмкинлекләрне ачарга булышучы, СССР тарихы белән кызыксынуны арттыру, традицияләрне яңарту, сәламәт яшәү рәвешен популярлаштыруны үз эченә алган яңа берләшмәләр булдыруга этәрү дә билгеләнгән юнәлешләрнең берсе булып тора. Слетта районның 16 яшьтән өлкән яшьләре (гаиләләр белән катнашканда балалар булса да ярый) катнаша. Слет биш кешедән торган командалар төзеп, төрле уеннар формасында үткәреләчәк. Һәр команданың спорт киеме, СССР эпохасы атрибутикасы булу мәҗбүри (галстук, пилотка, значоклар һ.б.). Слет тантаналы шартларда пионер линейкасы белән ачыла. Шулай ук учак өстендә ризык әзерләү, туризм, шахмат шашка ярышлары, учак янында пионер, комсомол чоры җырларын башкару, гитара, баянда уйнау, 80нче еллар дискотекасы оештыру планга кертелгән. Соңыннан җиңүчеләр бүләкләнәчәк. Слетта катнашу өчен заявка 7-58-74 телефоны яисә zainskudm@mail.ru электрон почтасы аша башкарылә.
