Москвадаги Германия элчихонаси Россия ҳукуматидан Иккинчи жаҳон урушидан кейин мамлакатдан олиб чиқиб кетилган маданий бойликларнинг қайтарилишини сўради. Мазкур сўровда “Маданий объект ва ашёлар урушдаги йўқотишлар ўрнини босадиган компенсация бўлмаслиги керак”лиги ҳам қайд этилган. Немис дипломатлари ўзларининг мазкур талабига 1907 йилги Уруш олиб бориш ҳақидаги Гаага қоидалари асос қилиб олинганини маълум қилган. Ўз навбатида Россия маданият вазирлиги уруш вақтида Германиядан олиб келинган маданий бойликларни қайтариш бўйича ҳеч қандай гап-сўз бўлмаслигини билдирди. Айни вақтда Россия музейларининг ўзи ҳам ҳозир Европа ва Америка кимошди савдоларига қўйилаётган, лекин бу музейларнинг йўқолган деб ҳисоблаб келинаётган экспонатлари қидирилаётганини билдирган. Германия ўзига қайтаришни талаб этаётган маданий бойликлар ичида энг салмоқлиси Генрих Шлиман топилмалари ва Эберсвалд хазинаси ҳисобланади. Шунингдек бу талабга эрамиздан аввалги IX асрга тегишли камёб олтин буюмлар ва тақинчоқлар ҳам киритилган. Ушбу мурожаат юзасида Россия президентининг халқаро маданий ҳамкорлик бўйича махсус вакили Михаил Швидкой “токи соғлом сиёсий мулоқот муҳити яратилмагунча бу икки мамлакат ўртасида ҳеч қандай маданий бойлик алмашинуви ҳақида гап ҳам бўлиши мумкин эмас”лигини таъкидлаган. Мазкур талаб юзасидан Давлат думасининг маданият ишлари қўмитаси раисининг биринчи ўринбосари Олга Казакова ҳам Германиянинг бу талабини ноқонуний деб ҳисоблашини билдирди. "Иккинчи жаҳон уруши якунларини қайта кўриб чиқиш фақат янги зиддиятларга олиб келиши мумкин. Агар Германия бу уруш натижалари бўйича нималарнидир талаб қилар экан, ўша даврда бизнинг мамлакатдан қанча нарсалар олиб кетилганини ҳам ҳисоблаб кўришса яхши бўларди”, – деган у.
