Бишкекдаги Хитой элчихонаси ёнидаги намойишчилар қирғиз ҳуқуматидан бир ой ичида мамлакатдан барча чет элликларни чиқиб кетишга мажбур қилишларини талаб қилмоқда. Бу ҳақда «Ҳордиқ» нашри хабар бермоқда. Шунингдек, намойиш пайтида “Кырк чоро” ташкилотининг вакиллари чет элликларга Қирғизистон фуқаролигини беришнинг қонунийлигини текшириш бўйича комиссия тузиш зарурлигини ҳам таъкидлаган. Уларнинг фикрига кўра, комиссия фуқаролик бериш бўйича охирги ўн йилликни текшириши керак. Митинг қатнашчилари, бир ойдан кейин ҳукумат ҳаракатсизлигини намойиш этса, ўзлари мамлакатдаги хорижий компанияларга бориб ким ноқонуний фаолият олиб бораётганини текширишларини айтишган. Митингни асосий сабаби, Хитойда этник қирғизларни таъқиб қилинишини чеклаш бўлган. У ердаги “қайта тарбиялаш лагерлари”да 50 мингга яқин қирғиз миллатига мансуб одамлар бор. Хабарларга кўра, лагерларда “ғоявий тарбиялаш, хулқни тузатиш» ва давлат тили – хитойчани ўргатиш мақсадида дарслар ўтилади. Жорий йилнинг октябрь ойида Хитой “қайта тарбиялаш лагерлари” борлигини расман тан олган. Ҳуқуқ ҳимоячиларининг фикрига кўра, у ерда қарийб 1 млн киши бор. Бишкекдаги митинг қатнашчилари, Хитой ҳукуматидан лагерда сақланаётган барча қирғизларни озод қилишларини сўраган. Улар Хитой ҳукуматига 10 кун муддат бериб, шу кунлар ичида “қайта тайёрлов лагерида” сақланаётган барча қирғизлар ҳақида маълумот бериши керак. 19 декабрь куни Қирғизистон президенти Сооронбой Жээнбеков ҳам матбуот анжуманида, ушбу муаммони эҳтиёткорлик билан ҳал қилиш зарурлигини билдирган. “Биз дипломатик каналлар орқали иш олиб боряпмиз. Бу масалада асосий гап Хитой фуқаролари ҳақида бораётганини унутмаслигимиз керак. Қандай қилиб, биз бошқа мамлакат ички ишларига аралашамиз?”, деган Жээнбеков. Шунингдек, у ўтган куни бир киши озод қилинганини айтган. Бироқ у Хитой эмас, Қирғизистон фуқароси бўлган. Хитой расмийларининг иддаосига кўра, марказларда “қайта тарбиялашнинг инсонпарвар ёндашувларидан фойдаланилмоқда”.
