Профессионал боксчимиз Шоҳжаҳон Эргашев 2019 йилнинг 23 февралида Нью-Йорк шаҳрида ўзининг навбатдаги жангини ўтказади. Миллий олимпия қўмитаси хабарига кўра, ушбу баҳсда ўзбекистонлик чарм қўлқоп устасига америкалик енгилмас боксчи Майкл Фокс рақиблик қилади. Маълумот учун, Шоҳжаҳон шу кунгача профессионал боксда 16 та жанг ўтказган ва уларнинг барчасида ғалаба қозонган (15 таси нокаут билан). Фокс эса проф рингда 19 маротаба жанг қилиб, уларнинг барчасида рақибларини таслим этган. Жангларининг 5 тасида у муддатидан олдин ғалаба қозонган. Эслатиб ўтамиз, аввалроқ Шоҳжаҳон Эргашев Россиянинг Краснодар шаҳрида навбатдаги жангини ўтказиб, аргентиналик Назарено Гастон Руизни нокаутга учратгани хабар қилинганди.
