Economist журналы Арменияны "жыл мемлекеті" деп атады
Арменияда "жемқорлық пен біліксіздіктен халық жерінген шақта" жемқорлық тақырыбында жазатын бұрынғы журналист, премьер-министр міндетін атқарушы Никол Пашинян "билікке заңды және ашық түрде келді" деп жазды Лондонда шоғырланған британдық журнал 18 желтоқсанда.
Көктем айларында Арменияда мыңдаған азамат билікте ұзақ жыл отырған бұрынғы президент Серж Саргсянның премьер-министр болып сайлануына қарсы жаппай наразылыққа шығып, ақырында Саргсян отставкаға кеткен. Парламентте Арменияның республикалық партиясы көпшілік болып отырғанына қарамастан мамыр айында Никол Пашинян премьер-министр болып сайланған. Оның "Менің қадамым" блогы 9 желтоқсанда өткен парламент сайлауында 70 пайыздан астам дауыс жинап, жеңіп шықты. Ал бұрынғы билік партиясы парламентке өту межесінен аса алмады.
Қарай отырыңыз: Армениядағы парламент сайлауы (10 желтоқсан 2018 жыл)
Армения халқының "путиншіл басшыны қуып, саяси науқанға Ресейдің араласуына мүмкіндік бермегенін" жазған журнал "мазасыз аймақтағы көне әрі ұтымды басқаруды қажетсінген халықтың демократия мен жаңаруға мүмкіндігі бар" деп жазды. Алайда Арменияның Әзербайжанмен таулы Қарабахқа қатысты "күрделі территориялық дауы" әлі шешілмегенін атап өтіп, кикілжің қайта тұтануы мүмкін екенін жазған.
Economist журналы 2013 жылдан бері "жыл мемлекетін" атап келеді. Бұл атақ соңғы 12 айда ілгері жылжыған елге беріледі.