Машина алсаң, текәсен алма, колак кагуың бар!
Татарстан Эчке эшләр министрлыгы кисәтә – соңгы вакытта “Тойота RAV-4” автомобилен урлау очрагы ешайган. Бигрәк тә бурларны бу марка автомобильнең ак төстәгесе кызыксындыра.
Министрлыкның матбугат хезмәте хәбәр иткәнчә, республикада 26 мартта һәм 2 апрельдә ике шундый машина урлау очрагы теркәлгән. Икесендә дә караклар “кодграббер” атлы махсус сканер кулланган дип фаразлана. Әлеге җайланма ябылу кодын ачыкларга ярдәм итә һәм шул сәбәпле салонга үтеп керергә мөмкинлек бирә. Гәрчә урлауга каршы система куелган булса да.