FSB, qırımtatar faaliniñ evini tintmege devam ete, evde küçük balalar bar (+video)
«Qırım birdemligi» cemaat birleşmesi, tahqiqat tedbirleri keçirilgen Memetovnıñ evi yanında yayın yapa.
Haber etile ki, qırımtatar faaline qoltutmaq içün bir çoq insan keldi. İsmet Memetovnıñ imayesine advokat Emil Kürbedinov ve uquqçı-aq qorçalayıcı Rustem Kâmilev keldiler.
«FSB hadimleri tahqiqat tedbirlerine başlamağa istey, protokol tizeler. Faqat advokat qarşı çıqıp, böyle tedbirlerniñ keçirilmesine dair mahkeme qararını soray», – dep bildire şaatlar.
Berilgen malümatqa köre, operativ-qıdıruv tedbirlerini Rusiye FSBsiniñ eki hadimi keçire, olar şaatlarnen beraber keldi.
FSB hadimleri Memetovnıñ Eski Qırımdaki müessisesini de tinte.
Qırımtatar Milliy Meclisiniñ reisi Refat Çubarov Qırım.Aqiqatqa izaat berip, İsmet Memetov ürmet qazanğan bir insan olğanını ayttı. Çubarov, «Meclis faaliyetinen alâqaları bar» kibi şübeler «tintüv keçirmek içün manaçıq» olğanını tüşüne.
Noyabrniñ 21-nde Rusiye FSBsi hadimleri Eski Qırım sakini, qırımtatar faali İsmet Memetovnıñ evinde tintüv keçire, dep bildire «Qırım birdemligi».
Memetov Rusiyede ve onıñ işğali altındaki Qırımda yasaqlanğan Qırımtatar Milliy Meclisiniñ faaliyetinen alâqaları bar olğanında şeklene. FSB malümatına köre, Memetov Meclisni maliye ete ve «ekstremist edebiyatnı saqlay».
İsmet Memetov oña aydınlatılğan qabaatlarnen razı degil ve yapılğan basqınıñ siyasiy mabüslerniñ mahkemelerine faal qatnağanınen bağlı olğanını tüşüne.
Rusiye uquq qoruyıcıları Eski Qırımdaki tintüvlerni izaatlamay.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.