Qırımda mahküm etilgen bir qaç Ukraina vatandaşı «çuqurğa» qapatıldı – Denisova

Ukraina Yuqarı Radasınıñ insan aqları vekâletlisi Lüdmila Denisovanıñ alğan malümatına köre, Qırımda nezaret altında tutulğan bir qaç Ukraina vatandaşı «çuqurğa» avuştırıldı.


«Qırımdan yaramay haberler keldi. «Çuqur» adlı yerde bir qaç Ukraina vatandaşınıñ tutulğanını ögrendim. Olarnıñ arasında eki afta evelsi tutulğan Dilâver Gafarov bar. Kartserge «Veciye Kaşka davasınıñ» mabüsleri – Bekir Degermenci, Ruslan Trubaç, Kazim Ametov – oğradılar. Daa eki qırımtatarı Rostov-na-Donuda «mahsus blokta» buluna. Ekisi de – «Hizb ut-Tahrir davasınıñ» mabüsleri Remzi Memetov ve Enver Mamutov», – dep yazdı Denisova Facebook saifesinde. O, BM insan aqları monitoring missiyasınıñ yolbaşçısı Fiona Freyzer ile kerçekleştirgen körüşüvini tarif etti. 


Ukraina ombudsmeni, «mezkür malümat teşkerilsin dep», Ukraina konsulına muracaat etkenini bildirdi. 




Qırım.Aqiqat mahküm qırımlılarnıñ advokatlarından malümat almağa tırışa.


Noyabrniñ 1-nde Rusiye FSBsi Qırımda «Ukrainada qanunsız silâlı birleşmeniñ faaliyetinde» iştirak etmesinde qabaatlanğan İslâm-Terek rayonınıñ sakini tutulğanını bildirdi. Ukraina Tış işler nazirligi, Gafarovnıñ nezaret alınmasını takbih etip narazılıq bildirdi.


«Veciye Kaşka davasınıñ» mabüsleri Bekir Degermenci, Ruslan Trubaç, Kazim Ametov dekabrniñ 7-ne qadar nezaret altında qaldırıldı. Qırımlı advokat Edem Semedlâyev Degermenciniñ tahqiqat izolâtorında tutulmasını cinayet dep saya.


Bu sene noyabr ayında Bağçasaraydaki «Hizb ut-Tahrir davasınıñ» mabüsi Enver Mamutov Rostov-na-Donudaki SİZOnıñ mahsus blokunda «suvuq, böcekler olğanını ve tavandan suv aqqanını» bildirgen edi. Mamutov ve bu davanıñ diger mabüsleri Zevri Abseitov, Remzi Memetov, Rustem Abiltarov yanvarniñ 11-ne qadar Rostov-na-Donu SİZOsında qalacaqlar.