Հնդկաստանում բացվել է փղերի առաջին հիվանդանոցը (լուսանկարներ)
Հնդկաստանում բացվել է փղերի համար նախատեսված առաջին հիվանդանոցը, որը գտնվում է հյուսիսային Ուտար Պրադեշ նահանգում:
Ինչպես նշում է Al Arabiya-ն, հիվանդանոցը համալրված է անհրաժեշտ սարքավորումներով, այդ թվում՝ անլար թվային ռենտգենով:
Աղբյուրը նկատում է, որ իր տեսակի մեջ բացառիկ հիվանդանոցը գրավում է ոչ միայն տեղացիների, այլև զբոսաշրջիկների ուշադրությունը:
Փղերը հնդկական մշակույթի ու կրոնի կարևոր մասն են, ուստի՝ զարմանալի չէ, որ նրանց այսպիսի ուշադրության են արժանացնում:
Հնդիկների համար սրբազան Մաթուրա բնակավայրում բացված հիվանդանոցը նախատեսված է հիվանդ, վնասվածքներ ստացած, ծեր փղերի բուժման, վերականգնման համար:
«Եթե փիղը վայրի բնության մեջ չի ապրում, դա չի նշանակում, որ նրան պետք է գերու պես վերաբերվել: Այս կենդանիներն արժանի են հարգանքի, անգամ եթե դուք նրանց ինչ-որ նպատակներով օգտագործում եք»,-նշել է բնապահպան Ջիթա Սեշամանին:
Հայտնի է, որ վերջին 5 տարում Հնդկաստանում փղերի թիվը կրճատվել է ավելի քան 3.000-ով ու այժմ կազմում է 27.312: