Jamala Mustafa Cemilevniñ yubileyinde yırladı (+video, foto)
Qırım.Aqiqat mühbiriniñ malümatına köre, Jamala birinciler sırasında Mustafa Cemilevni hayırlap, «Meni ğamdan azat eyle» qırımtatar yırını icra etti.
«Mustafa ağamıznı can-yürekten hayırlayım. Uzun-uzun ömürler tileyim. Bizni er daim quvandırsın», – dedi Jamala ve Mustafa Cemilevni quçaqladı.
Malüm ki, Ukraina prezidenti Petro Poroşenko noyabrniñ 13-nde 75 yaşını toldurğan qırımtatar halqınıñ lideri, Ukraina Yuqarı Radasınıñ deputatı, Ukraina prezidentiniñ qırımtatar halqı işlerinden vekâletlisi Mustafa Cemilevni şahsen hayırlap, Azatlıq Nişanını berdi.
Mustafa Cemilev, Rusiye ve Qırımda siyasiy sebeplerden tutulğan qırımlılarnıñ balalarına yardım etmege çağırğan edi.
Cemilev, «Qırım» Vaqfı» hayriye teşkilâtınıñ esabına para yollap, «Qırımlı siyasiy mabüslerniñ balalarına yardım» dep yazmağa rica etti.
Mustafa Cemilev, qırımtatar halqınıñ aqları oğrunda küreşip, halqınıñ ürmetini ve qırımtatar milliy lideri statusını qazandı.
1966-1983 seneleri devamında o, altı kere apiske alınğan edi. Yedi kere mahküm etilgen Cemilev «sovetler qurumını aqaretlegen fikirleri» içün 15 yıl apiste yattı. 1975-1976 seneleri Omsk apishanesinde 303 kün açlıq narazılığını tuttı. 1986 senesi azatlıqqa çıqtı.
1991 senesinden 2013 senesine qadar Qırımtatar Milliy Meclisiniñ reisi edi. Mustafa Cemilev – III-VII çağırılış Ukraina Yuqarı Radasınıñ halq deputatı. 2014 senesi noyabr ayından berli – VIII çağırılış Ukraina halq deputatıdır.
2014 senesi avgustnıñ 20-nde Ukraina prezidenti Petro Poroşenkonıñ №657/2014 fermanı esasında Ukraina prezidentiniñ qırımtatar halqı işlerinden vekâletlisi olaraq tayin etildi.
Mustafa Cemilev Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.