Россияда харидор "Apple"нинг смартфонини сотиб олиш учун дўконга бир ванна чақа пул кўтариб келди. Ҳодиса фотоси ва изоҳини "Apple"нинг расмий ритейлери ҳисобланган re:Store дўконини бошқарувчи "Inventive Retail Group" компанияси матбуот котиби Людмила Семушина "Facebook"да эълон қилди. Семушинанинг сўзларига кўра, харидор танга пуллар билан тўлдирилган ваннани “шундай кўчадан” кўтариб келган. Суратда сотувчи пулни қўлда санаш билан бандлигини кўриш мумкин, чунки дўконда тангани автоматик санаб берадиган қурилма йўқ. Харидорнинг сўзларига кўра, ваннада 100 минг рублга яқин пул бўлган. Тангалар санаб бўлинганидан сўнг, у хотираси 256 гигабайтга тенг iPhone XS смартфонини сотиб олишга муваффақ бўлган.
