Залкар жазуучу Чыңгыз Айтматовдун 90 жылдыгына карата анын чыгармаларынын негизинде тартылган тасмалар Москвадагы кинотеатрларда көрсөтүлүп жатат. Бул тууралуу Кыргызстандын Орусиядагы элчилигинин өкүлү Гүлбарчын Байымбетова кабарлады. Анын айтымында, Т.Океев атындагы "Кыргызфильм" киностудиясынын жана Орусиянын Маданият министрлигинин колдоосу менен Айтматовго арналган иш-чаралардын экинчи бөлүгү башталды. Москва шаарынын “Звезда”, “Факел”, “Юность” кинотеатрларында кыргыз кино тасмаларын көрсөткөн кинодекада өтүп жатат. Он күндүн ичинде “Ак Кеме”, “Кызыл алма”, “Караш ашуусунда”, “Бойго жетелектерге бейтапкана", “Ак барстын урпагы”, “Зной” жана башка тасмалар көрсөтүлөт.
Москвадагы кыргыз диаспорасы менен биргеликте Орусиянын башка региондорунда да түрдүү багыттагы мааракелер өтүп жатат.
Жазуучунун 90 жылдыгын Кыргызстанда жана эл аралык деңгээлде белгилөө боюнча былтыр президенттин жарлыгы чыккан. (КЕ)
