«Реал» бош мураббийи Хулен Лопетеги ўз лавозимини тарк этиш арафасида. Marca маълумотига кўра, испаниялик мутахассис бугуннинг ўзида истеъфога чиқарилиши мумкин. Бундан аввалроқ «Реал» мураббийни ЕЧЛ гуруҳ босқичи доирасида «Виктория» Пльзень жамоасига қарши ўйингача истеъфога чиқармаслиги ҳақида хабар тарқалганди, аммо жамоани кейинги ўйингаёқ бошқа мураббий бошлаб бориши ойдинлашмоқда. Ҳозирда бу ўринга «Реал»нинг собиқ футболчиларидан бири, «Кастилья» мураббийи бўлиб турган Сантьяго Солари кўрилмоқда. Уни Антонио Конте ва Лоран Бландан муносиброқ номзод сифатида кўришмоқда. As маълумотига кўра, «Реал» президенти Флорентино Перес жамоанинг яна бир собиқ футболчиси Гути номзодини ҳам эътиборга олиб қўйган. У Гути Зинедин Зиданнинг муваффақиятларини такрорлай олишига ишонч билдирмоқда. Гути бунгача «Реал» U-19 жамоаси билан ишлаган, ҳозирда «Бешиктош» мураббийлар штабида Шенол Гунешга ёрдамчилик қилади. As маълумотига кўра, Солари ҳам яхши номзод, аммо «Реал» у «Кастилья» билан Сегунда Б лигасида муваффақиятли иштирок этаётгани учун, унга тегмасликни маъқул кўрмоқда. Шу билан бирга, «Реал» бош мураббийи лавозимини кейинроқ ҳозирда «Тоттенҳэм»ни бошқараётган Маурисио Почеттино эгаллаши мумкин. Мадрид клуби шу йил ёзида ҳам ушбу аргентиналик мутахассисни жамоага жалб этишга ҳаракат қилганди. Маълумот учун, Испания чемпионатининг 9-турида «Реал» ўз майдонида «Леванте»га 1:2 ҳисобида мағлуб бўлди ва ғалабасиз сериясини 5 ўйинга етказди. Бунгача Хулен Лопетеги жамоаси «Севилья» (0:3), «Атлетико» (0:0), ЦСКА (0:1) ва «Алавес» (0:1) клубларига қарши ўйинларда муваффақиятсизликка учраганди.
