Պերուացի տղան իր սեփական բանկն է հիմնել 7 տարեկան հասակում և այսօր 2000 հաճախորդ ունի
Երեխաներից շատերը երազում են գործարար դառնալ, երբ մեծանան, սակայն պերուացի Ադոլֆո Կիսոկալա Կոնդորին այդ գաղափարն իրականացրել է դեռևս 7 տարեկանում:
Ինչպես ներկայացնում է Oddity central-ը, պերուացի տղան վեց տարի առաջ երեխաների համար նախատեսված խնայողական բանկ է հիմնել, որն առաջինն է իր տեսակի մեջ: Այժմ բանկն արդեն ավելի քան 2000 10-18 տարեկան հաճախորդ ունի:
Ինչպես նա ինքն է պատմել, իր մոտ նման միտք է ծագել, երբ նկատել է, թե ինչպես են բազմաթիվ երեխաներ գումար ծախսում քաղցրավենիքի կամ խաղալիքների վրա, թեև կարող են ավելի նպատակային օգտագործել այդ գումարը կամ խնայել:
Այդ տարիքում հասկանալով խնայելու և ֆինանսական հաստատությունների հասանելիության կարևորությունը՝ 7-ամյա Ադոլֆոն դպրոցի տնօրենի աջակցությամբ բանկային համակարգ է ստեղծում, որի անդամ կարող էր դառնալ յուրաքանչյուր երեխա 5 կգ վերամշակվող թափոն (պլաստիկ և թուղթ) ներկայացնելով: Այնուհետև նրանք պետք է ամեն ամիս ևս մեկական կգ վերամշակվող թափոն բերեն անդամագրությունը պահպանելու համար:
Բանկում կուտակված գումարը հանելու համար երեխաները պետք է նախ նպատակ որոշեն և գումարը կարող են ստանալ միայն այդ նպատակի իրագործման համար:
Տղային հաջողվել է պայմանավորվածություն ձեռք բերել մի շարք ընկերությունների հետ, որոնք հարմար գնով վերցնում են վերամշակվող նյութերը:
Այսօր 13-ամյա Ադոլֆոն, ով կարծում է, որ երեխաները ոչ թե երկրի ապագան են, այլ ներկան, ցանկանում է օրերից մի օր դառնալ Պերուի նախագահ՝ երկրում բարեփոխումներ անելու համար: