აშშ-ის ფედერალურმა სასამართლომ პრეზიდენტ დონალდ ტრამპის კამპანიის ყოფილი მენეჯერი, პოლ მანაფორტი დამნაშავედ სცნო 18-დან რვა ბრალდებაში გადასახადებისთვის თავის არიდების და საბანკო მაქინაციების თაობაზე. დანარჩენ 10 ბრალდებასთან მიმართებით სასამართლომ შეთანხმებას ვერ მიაღწია. განაჩენი გამოცხადდა ვირჯინიის შტატში, ალექსანდრიაში. ბრალდებები უკავშირდება სამუშაოს, რომელსაც მანაფორტი ეწეოდა 2010-2014 წლებში უკრაინის პოლიტიკოსების, მათ შორის ყოფილი პრეზიდენტის, ვიქტორ იანუკოვიჩისთვის. პროკურორების თქმით, მანაფორტმა დამალა მილიონობით დოლარის შემოსავალი, რომელიც მან უკრაინის პარლამენტარებისგან მიიღო. მანაფორტის წინააღმდეგ მეორე, უფრო სერიოზული პროცესი მომავალ თვეში დაიწყება ქალაქ ვაშინგტონში.
