Qırımda mahkeme bloger Memedeminovnıñ işi boyunca oturışuvnı başqa künge qaldırdı
Memedeminov, onı bugün saba oturışuv aqqında haberdar etip, advokatnıñ apellâtsion şikâyetini bergenlerini ve bu sebepten oturışuvğa azırlanıp olamağanını ayttı. Ondan ğayrı, tahqiqat izolâtorı ile video alâqa kritik derecede yaman olğanı içün Memedeminovnıñ imayege aqqından tolusınen faydalana bilmesi içün advokatnıñ izolâtorda onıñ yanında bulunması kerek.
Akem imayeniñ muracaatını qanaatlendirdi. Oturışuv qapalı rejimde keçti, doğmuşlarnı mahkeme binasına yibermediler.
Memedeminovnıñ ömür arqadaşı Lemara: «Soñki vaqıtlarda oturışuvlarğa kirip olamayım. Bugün bayram olğanına baqmadan, mahkeme kene de qapalı rejimde keçti. Er şey qanun boyunca olsa, bizni ne içün diñleyiciler sıfatında içeri yibermeyler, bizden nelerni gizleyler?», – dep vaziyetni izaladı.
Mevzuğa dair: «Bizde bayram, babaçığım qaytqan soñ olacaq». Nariman Memedeminovnıñ qorantası onıñ tevqifinden soñ nasıl yaşay
Bundan evel Rusiyeniñ kontroli altında olğan Aqmescitniñ Kiyevskiy rayon mahkemesi Memedeminovğa tevqif müddetini 2 ayğa uzattı. O, tahqiqat izolâtorında oktâbr 15-ke qadar qalacaq.
Mart 22-de Bağçasaray rayonında Rusiye telükesizlik hadimleri ve uquqqoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Mart 23-te mahkeme Memedeminovnı tevqif etti.
Mart 23-te QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.