Գլխավոր դատախազության մեկնաբանությունը համոզիչ չէր, եթե չասեմ հակառակը. Է. Շարմազանով
«Ծանոթացա գլխավոր դատախազության ծավալուն մեկնաբանությանն ու պարզաբանմանը։ Կներեք, բայց գլխավոր դատախազության հարգելի գործընկերների մեկնաբանությունը համոզիչ չէր, եթե չասեմ՝ հակառակը»,- Tert.am-ի հետ զրույցում ասաց ԱԺ փոխնախագահ Էդուարդ Շարմազանովը՝ ադրադառնալով Ռոբերտ Քոչարյանին կալանքից ազատելու բողոքարկման վերաբերյալ իր հնչեցրած մեղադրականներին՝ Գլխավոր դատախազության տված գնահատականին։
Հիշեցնենք՝ Գլխավոր դատախազությունը ծավալուն անդրադարձ էր կատարել վերոնշյալին՝ ընտրովի արդարադատության վերաբերյալ Էդուարդ Շարմազանովի գնահատականը անվանելով անհիմն ու անտեղի։
Շարմազանովի կարծիքով, եթե ինչ-որ բան այս պատմության մեջ անտեղի էր, ապա դա նախ և առաջ Գլխավոր դատախազության այս ոչ համոզիչ պարզաբանումն էր։
«Իմ համոզմունքով՝ «Սասնա ծռեր» խմբավորման բոլոր անդամները մասնակցել են ահաբեկչական գործողության՝ ընդդեմ ՊՊԾ գնդի և ՀՀ-ի, որի հետևանքով սպանվել են ոստիկանության սպա և ենթասպաներ։ Իմ համոզմունքն այն է, որ անկախ երկրում իշխանության փոփոխությունից ուժային կառույցների անդամները ու ղեկավարները նախ և առաջ պետք է ունենան հստակ և ուղիղ պետական մոտեցում, թե չէ «Хочешь жить умей вертеться» մոտեցումով պետություն չենք կարող կառուցել։ Ջերմագին բարևներ։ Պինդ մնացե՛ք»,-հավելեց ԱԺ փոխնախագահը։