Նարեկ Սարգսյանը «հավանաբար շուտով» կհայտնվի ՀՀ ոստիկանության տեսադաշտում. Օիսպյան
«Նարեկ Սարգսյանը գտնվում է միջազգային հետախուզման մեջ, մենք համագործակցում ենք «Ինտերպոլ»-ի հետ և Հայաստանի Հանրապետության ոստիկանության և «Ինտերպոլ»-ի միջև համաձայնագրի շրջանակներում մենք իրականացնում ենք այդ գործընթացը։ Թույլ տվեք չմանրամասնել, բայց այնպիսի տեղեկություներ կասեմ ձեզ, որ ոնց որ թե շուտով մեր տեսադաշտում կլինեն», - այսօր հրավիրված ասուլիսի ժամանակ հայտարարեց Հայաստանի ոստիկանապետ Վալերի Օսիպյանը։
Ճշտող հարցին, թե Նարեկ Սարգսյանը ե՞րբ է հատել Հայաստանի սահմանը, Օսիպյանը պատասխանեց. - «Հատել էր այն ժամանակաշրջանում, երբ որ մենք հայտարարել էինք հետախուզում դրանից մեկ-երկու օր առաջ»։
Նարեկ Սարգսյանի ու իր թիկնապահի նկատմամբ հետախուզում էր հայտարարվել դեռ հուլիսի 5-ին, քանի որ իրավապահները պարզել էին, որ Նարեկն իր թինկապահի հետ հունիսի 22-ին մեկնել է Մոսկվա՝ այնտեղից որևէ եվրոպական երկիր մեկնելու նպատակով։ Իսկ մինչ Հայաստանը լքելը Նարեկ Սարգսյանը Արտեմ Պետրոսյանի միջոցով իր ընկերոջը՝ Սերոբ Սահակյանին էր փոխանցել Երևանի Արամի փողոցի շենքերից մեկի բնակարանի բանալին:
Ավելի ուշ՝ հունիսի 25-ին, նույն թիկնապահի միջոցով նա Սահակյանին խնդրել է վերոնշյալ բնակարանում գտնվող երկու ճամպրուկները տեղափոխել այլ վայր: Այդ ճամպրուկներում հայտնաբերվել էր կոկաին և մեթամֆետամին տեսակի թմրամիջոցներ, նաև 4 ատրճանակ, փամփուշտներ, անհայտ ծագման հաբեր, ապակյա և պլաստմասսայե խողովակներ, որոնք, ըստ ԱԱԾ-ի, ամենայն հավանականությամբ, օգտագործվել են թմրանյութ ընդունելու նպատակով։ Արտեմ Պետրոսյանը կալանավորված է։
Բացի այդ, ԱԱԾ-ն տեղեկացրեց, որ հաղորդում է ստացվել այն մասին, որ դեռևս 2013 թվականին Նարեկ Սարգսյանը չարաշահելով նկարիչ Մարտիրոս Սարյանի ժառանգներից մեկի վստահությունը, նրանից վերցրել է նկարչի շուրջ 280 000 ԱՄՆ դոլար արժողությամբ թվով 14 գծանկարները` խոստանալով դրանց դիմաց վճարել 28 հազար ԱՄՆ դոլար, իսկ մնացած գումարով համատեղ հիմնադրել խաղատուն և հովանավորել դրա գործունեությունը: Նկարներին տիրանալուց հետո Սարգսյանը խոստումը չի կատարել և անտեսելով տուժողի բազմաթիվ պահանջները հրաժարվել է վերադարձնել նկարները։
ԱԱԾ աշխատակիցները հուլիսի 4-ին խուզարկություն են կատարել Նարեկ Սարգսյանի հաշվառման վայրում, որտեղից հայտնաբերվել են նկարները, ինչպես նաև 115 000 ԱՄՆ դոլար, 27 000 եվրո, թանկարժեք ժամացույցներ, բազմաթիվ ոսկյա մետաղադրամներ և զարդեր, որոնց ձեռքբերման հանգամանքների օրինականությունը ստուգվելու է քրեական գործի վարույթի շրջանակներում: