Այսօր լրանում է Սենցովի հացադուլի հարյուր օրը
2014 թվականի գարնանը՝ Ղրիմը Ռուսաստանին բռնակցելուց հետո, ռուսական ոստիկանությունը սցենարիստ, գրող և ռեժիսոր Սենցովին ահաբեկչության մեղադրանքով ձերբակալել է Ղրիմում:
Ըստ ռուսաստանցի իրավապահների, Սենցովը «Աջ սեկտոր» ուկրաինական ազգայնական-դիվերսիոն խմբի անդամ է և իրագործել է մի շարք ահաբեկչական գործողություններ Ղրիմի տարածքում:
Ուկրաինացի կինոռեժիսորը ներկայացված մեղադրանքն անհեթեթություն է անվանել և ասել է, որ քաղաքական հետապնդման է ենթարկվում:
Դատարանը 2015 թվականի օգոստոսին Սենցովին դատապարտել է 20 տարվա ազատազրկման՝ խիստ ռեժիմի գաղութում:
Մի շարք միջազգային իրավապաշտպան կառույցներ, կինոաշխարհի միություններ և կրոնական կազմակերպություններ պահանջել են ազատ արձակել Սենցովին:
Ռուսաստանի նախագահ Վլադիմիր Պուտինի հետ կինոռեժիսորի խնդիրը քննարկել է Ֆրանսիայի նախագահ Էմանյուել Մակրոնը: Գերմանացի օրենսդիրները կանցլեր Անգելա Մերկելին հորդորել են արծարծել Սենցովի թեման Պուտինի հետ զրույցում:
100 օր առաջ՝ մայիսի 14-ին, Սենցովը հացադուլ է հայտարարել և պահանջել է ազատել բոլոր քաղբանտարկյալներին:
Սենցովի փաստաբան Դմիտրի Դինզեն ասել է, թե Կրեմլի դիրքորոշումը կարելի է որակել մեկ նախադասությամբ՝ «թող սատկի, ուրիշների համար լավ դաս կլինի»:
Փաստաբանի փոխանցմամբ, պաշտպանյալը շատ թույլ է, գրեթե չի բարձրանում անկողնուց և ունի ցավեր սրտի շրջանում:
Սենցովին բանտում այցելած ազգական Նատալյա Կապլանն ասել է, որ ռեժիսորը կտրականապես հրաժարվում է ներման խնդրագրով դիմել Պուտինին: Ըստ Կապլանի, Սենցովն ասել է, թե «վերջը մոտ է»:
Օգոստոսի 14-ին Կրեմլը մերժել է որդուն ներում շնորհելու Սենցովի մոր դիմումը: Նախագահ Պուտինի խոսնակ Դմիտրի Պեսկովն ասել է, թե, ըստ գործող կարգի, բանտարկյալն անձամբ պետք է ներման խնդրագիր ներկայացնի:
Օգոստոսի 16-ին ՄԱԿ-ի փորձագետները պահանջել են առանց նախապայմանների անհապաղ ազատել Սենցովին:
«Նրա կյանքն անմիջական վտանգի տակ է, նրա դատավարությունը և դատավճիռը չեն համապատասխանել միջազգային իրավունքի պահանջներին», - հայտարարել են ՄԱԿ-ի փորձագետները:
Ռուսաստանի Դաշնության իշխանությունն այսօրվա դրությամբ մնում է անդրդվելի: