Էրդողանը հայտարարել է, որ ԱՄՆ-ն թիկունքից հարված է հասցրել իրենց
Թուրքիայի նախագահ Ռեջեփ Թայիփ Էրդողանը հայտարարել է, որ երկրի ռազմավարական դաշնակից ԱՄՆ-ն թիկունքից հարված է հասցրել իրենց՝ փորձելով ճնշում գործադրել տնտեսական ոլորտում, գրում է թուրքական «Սաբահ» պարբերականը։
«Մենք չենք կարող դա ընդունել։ Մի կողմից դուք խոսում եք ռազմավարական դաշինքի մասին, մյուս կողմից՝ հարված հասցնում մեզ մեջքի հետևից», - ասել է Էրդողանը։
Ավելի վաղ Էրդողանը հայտարարել է, որ երկրում սկսված տնտեսական ճգնաժամի ետևում կանգնած է ԱՄՆ-ն։ Ավելին՝ Էրդողանը ԱՄՆ-ին մեղադրել է նաև 2016 թվականին Թուրքիայում հեղաշրջման փորձը հովանավորելու համար
Թուրքիայի նախագահը նաև համոզված է, որ երկրում տնտեսական իրավիճակի լարմանը մեծապես նպաստում են սոցցանցերում խուճապ տարածողները, որոնց հետ կապված թուրքական դատախազությունն արդեն հետաքննություն է սկսել։
Նշենք, որ նախօրեին թուրքական լիրան շարունակել է արագընթաց անկումը դոլարի նկատմամբ՝ գրանցելով նոր ռեկորդ․ այսօր մեկ դոլարը Թուրքիայում վաճառվել է 6,8 թուրքական լիրայով։ Հիշեցնենք, որ նախորդ շաբաթ մեկ դոլարը 5 լիրա արժեր, իսկ անցյալ ամիս՝ 4,5-4,8 լիրա։
Մեկ եվրոն այժմ Թուրքիայում վաճառվում է 7,9 լիրայով, այն դեպքում, երբ ամսվա սկզբին մեկ եվրոն Թուրքիայում արժեր 6 լիրա։