სამართალდამცავებმა სვანეთში დააკავეს მამა, რომელსაც რვა შვილი წლების განმავლობაში ჰყავდა ჩაკეტილი სახლში. ინფორმაციას „ინტერპრესნიუსი“ ავრცელებს შინაგან საქმეთა სამინისტროზე დაყრდნობით. უწყების ინფორმაციით, ამირან დევნოზაშვილი სისხლის სამართლის კოდექსის 150-ე მუხლით დააკავეს, რაც იძულებას გულისხმობს. ინფორმაცია სახლში გამოკეტილი მოზარდების შესახებ მიმდინარე წლის იანვარში გახდა ცნობილი. ადგილობრივი მოსახლეობის ცნობით, ამირან დევნოზაშვილს რვა შვილი - სამი ბიჭი და ხუთი გოგო ჰყავს. ამირან დევნოზაშვილი ამბობდა, რომ მისი შვილები საზოგადოებისგან მხოლოდ ცუდს ისწავლიდნენ და ამიტომ ჰყავდა სახლში ჩაკეტილი. შსს-ს ინფორმაციით, ამირან დევნოზაშვილი ორი კვირის წინ დააკავეს.
