Татарстан Президенты гүзәл затларны бәйрәм белән котлый

“Кадерле ханымнар һәм туташлар! Сезне чын йөрәктән 8 Март – Халыкара хатын-кызлар көне белән тәбрик итәм! Мартның нурлы, җанга җылы өсти торган бу көне хатын-кызларга ихлас мәхәббәт, эчкерсез соклану һәм олы хөрмәт белән сугарылган. Гүзәл һәм нәзакәтле затлар элек-электән тереклекнең гәүдәләнеше, шәфкать-мәрхәмәт һәм илһам чыганагы, матурлык, камиллек, мөлаемлык үрнәге булып санала. Табигать аларга кешелек яшәешен дәвам иттерү кебек олы бурыч йөкләгән.

Әнием, хатыным, апам, сеңлем, кызым – нинди ягымлы сүзләр! Аларның мәхәббәте, тугрылыгы, йөрәк җылысы безгә, авырлыкларны җиңеп, гел алга барырга көч бирә. Хатын-кызларыбыз республикабыздагы социаль-икътисадый һәм иҗтимагый-сәяси процессларда актив катнаша, Татарстанның сәнәгате, авыл хуҗалыгы, мәгариф, сәламәтлек саклау өлкәсе, мәдәнияте һәм фәне үсешенә бәһаләп бетергесез өлеш кертә. Һәрбер җиңүегез, уңышыгыз һәм казанышыгыз безнең күңелләрдә сөенеч һәм горурлану тойгылары тудыра.

Сугыш чоры михнәтләрен, ирләр белән беррәттән, нәфис иңнәренә салып, сынмый-сыгылмый батырларча үткән, дошман хәрәбәгә әйләндергән Ватаныбызны яңадан аякка бастыру өчен хезмәт куйган фидакарь хатын-кызларыбызга татарстанлылар зур хөрмәт хисләре саклый. Сез күрсәткән каһарманлыкның кешелек тарихында тиңе, ә безнең сезгә булган рәхмәтебезнең чиге юк. Бөек Җиңүнең 70 еллыгы якынлашкан көннәрдә данлыклы ветераннарыбызны котлау аерым бер тирән мәгънәгә ия була.

Кадерле хатын-кызлар, сезгә чын күңелдән ак бәхет, иминлек, якыннарыгызның назын, яратуын, кадерләвен тоеп озын гомер кичерүегезне телим. 8 Март сезгә елмаюлар һәм чәчәк бәйләмнәрен мулдан бүләк итсен, йөзегез сөенечтән балкысын! Ә без, ир-егетләр, бу гүзәл бәйрәм мөмкин булганча озаккарак сузылсын һәм күбрәк шатлык китерсен өчен барысын да эшләрбез”, - диелә Татарстан Республикасы Президенты Р.Н. Миңнехановның котлау текстында.

http://tat.tatar-inform.ru/