Նիկոլ Փաշինյանը տալիս է գլխավոր մեսիջը, իսկ իր թիմը պետք է բացի փակագծերը. Ստեփան Գրիգորյան  

Tert.am–ի հետ զրույցում «Գլոբալիզացիայի և տարածաշրջանային համագործակցության» հասարակական կազմակերպության նախագահ Ստեփան Գրիգորյանն անդրադառնում է Վարչապետ Նիկոլ Փաշինյանի՝  հուլիսի 20-ին հրավիրած մամուլի ասուլիսի արտաքին քաղաքական բլոկին վերաբերող հարցադրումներին:


-Պարո՛ն Գրիգորյան, Ռուսաստանի վերաբերյալ Նիկոլ Փաշինյանի հայտարարությունը  (որում հույս էր հայտնել, որ ՌԴ-ն Ադրբեջանին թույլ չի տա նոր պատերազմ սանձազերծել) ԱԺ արտաքին հարաբերությունների հանձնաժողովի նախագահ Արմեն Աշոտյանը  խոցելի է համարել՝ նշելով, որ այդ ձևակերպումներով՝ մի կողմից պատերազմի վերսկսման պատասխանատվությունից մի տեսակ ազատում է Իլհամ Ալիևին, մյուս կողմից՝ թերագնահատում այլ գերտերությունների տեսանելի շահերը: Ի՞նչ կարծիք ունեք այս առնչությամբ:

- Համարում եմ, որ առանձին դեպքերում իրոք շատ օգտակար է իրերը իրենց անուններով կոչելը: Եկեք իրար չխաբենք. 2016-ի ապրիլին, այո, Ադրբեջանը շատ էր ուզում սկսել պատերազմ, կոպիտ ասած, եթե չզգային Ռուսաստանի չեզոք դիրքորոշումը, իրենք չէին էլ համարձակվի: Այո՛, իրենք այսօր էլ ուզում են հարձակվել, խնդիրը լուծել ուժով, բայց կա միջազգային հանրություն, նաև՝ ՌԴ-ն, որոնք իրենց պահվածքով պետք է զսպիչ մեխանիզմ լինեն: Ու ակնհայտ է, որ 2016-ի ապրիլին Ռուսաստանը, կոպիտ ասած, արգելակը հանեց: Ու ես բացատրեմ Նիկոլ Փաշինյանի միտքը, որ, այո, մենք հասկանում ենք, որ Ադրբեջանը չի համարձակվի, եթե Ռուսաստանը չուզենա: Այո: Եվ դա ինչ-որ չափով հենց ՌԴ–ի պատասխանատվությունն է: Չեմ ասում, որ սա պետք է դառնա մշտական մեր արտաքին քաղաքականության մեջ, բայց կրկնում եմ՝ առանձին դեպքերում շատ օգտակար է իրերն իրենց անուններով կոչելը: Ավելին՝ սրանով նա նույնիսկ հաճոյախոսել է ՌԴ-ին՝ ասելով, որ մենք գիտենք, որ ձեր ազդեցությունը շատ մեծ է ու դիմում ենք՝ զսպեք Ադրբեջանին:

-Իսկ ԵԱՀԿ ՄԽ համանախագահությանը թերագնահատելու, Ալիևին պատասխանատվությունից ազատելու մեկնաբանությունների մասով ի՞նչ կասեք:

-Կա նման բան, որ ինչ էլ ասես, դա տարբեր մեկնաբանությունների տեղիք է տալու:Երկրորդ. Արևմուտքը չի էլ թաքցնում, որ մեր տարածաշրջանում որևէ մեկը չունի այնպիսի ազդեցություն, ինչպիսին ունի Ռուսաստանը: Ես սա բազմիցս լսել եմ թե՛ եվրոպացիներից, թե՛ ամերիկացիներից: Ըստ որում, նաև՝ պաշտոնական մակարդակներում: Սա մեծ գաղտնիք չէ: Որ Հարավային Կովկասում Ռուսաստանի դերը շատ մեծ է, իսկ առանձին դեպքերում՝ որոշիչ:

- Իսկ ԵՄ մասով Փաշինյանի վերջին հայտարարություններն ինչպե՞ս կդիտարկեիք՝ հաշվի առնելով Վարչապետի բրյուսելյան ձևակերպումները, ինչպես նաև Սվիտալսկու արձագանքը: Ի՞նչ կարող եք արձանագրել: 

-Բրյուսելում իր հայտարարածն, ի վերջո, բերեց նրան, որ Սվիտալսկին անցկացրեց մեծ կոնֆերանս, որի ժամանակ, ասաց՝ այո, բերեք, ներկայացրեք առաջարկներ: Այսինքն, տեսա՞ք,Բրյուսելում իր անսպասելի քայլը բերեց դրականի: Իրենք հիմա պատրաստ են ավելի մեծ աջակցություն հատկացնել: Ուղղակի, իրենք ճիշտ են ասում, որ բերեք առաջարկներ: Ու այստեղ կցանկանայի ուշադրությունը սևեռել հետևյալի վրա. այստեղ է, որ, երբ լիդերը՝ առաջին դեմքը խոսում է, գլխավոր «մեսիջները» ուղարկում է, պետք է սկսի աշխատել 2-րդ էշելոնը, համապատասխան գերատեսչությունները, իր ապարատը: Ավելի ակտիվ պետք է աշխատեն, որ այս հարցերի պատասխաններն իրենք տան, բացեն փակագծերը: Բերեմ մեկ օրինակ, Նիկոլ Փաշինյանն ու իր կառավարությունն ասում են՝ չի փոխվել արտաքին քաղաքականությունը Հայաստանում: Դա նշանակում է, որ ինքը նկատի ունի՝ ձևաչափը չի փոխվել: Բայց հասկանում եք, չէ՞, որակը և բովանդակությունը ակնհայտ է, որ կփոխվեն: Թե՛ Ռուսաստանի, թե՛ Եվրոպայի հետ: Բովանդակությունը, ըստ իս, կլինի ավելի հարուստ: Բայց սա ես չպետք է «բացեմ», սա իր թիմը պետք է բացի, քանի որ վարչապետը չպետք է բացի բոլոր փաստաթղթերը: Նույնը՝ հիմա. ինքը մի միտք ասեց ՌԴ-ին առնչվող, ՌԴ–ն ուշադիր հետևում է, բայց իր ասելուց հետո, տարբեր խողովակներով՝ Պաշտպանության նախարարություն, դիվանագիտական խողովակներով, իրենք պետք է աշխատեն ռուսաստանցի պաշտոնյաների հետ, որ այդ մեսիջն իրենց մոտ ճիշտ ընկալվի:

-Իսկ «բացելուց» բացի դա ենթադրո՞ւմ է, օրինակ՝ ԵՄ պարագայում, ԵՄ համաձայնագրում ինչ-որ լրացումներ, ընդլայնումներ, թե՞ ուղղակի ծրագրերի մակարդակով:

- Շատ ճիշտ հարց է: Չեմ կարծում, որ հարցն այսօր Համաձայնագիրն ընդլայնելու կամ ուժեղացնելու մասին է: Այդ պայմանագրի մեջ ամեն ինչ էլ գրված է: Ուղղակի ծավալը: Ենթադրենք մի հարց եք պլանավորել: Ես գիտեմ, որ ԵՄ-ն պլանավորում է Հայաստանի շրջաններում վերագործարկել մի քանի գործարաններ: Հիմա. ծավալը կարող է լինել 3 գործարան, կարող է լինել 20: Այնպես որ, համարում եմ, այստեղ առաջին հերթին խոսքը ծավալի մասին է, ոչ թե խորության:

-Նաև Նիկոլ Փաշինյանը երեկ հայտարարեց, որ կոռուպցիոն  բացահայտումները ներառել են շրջանակների, որոնք ծափահարում էին հեղափոխությունը: Դուք հասկացե՞լ եք, կարո՞ղ եք ասել՝ ում կամ ինչ շրջանակների մասին էր խոսքը: 

- Ոչ, ինձ համար հասկանալի չէ, բայց եթե ինքը պատժի սխալ արած մարդուն, ում ինքն է նշանակել, սա միայն ողջունելի կլինի: Եթե իրոք կա մարդ, որ նման կոռուպցիոն քայլեր է արել: Սա իրոք կնշանակի, որ, այո, մարդը իր թիմից է, ինքը պատժում է:

-Դե այդ մասին դեկլարատիվ հայտարարություններ միշտ են լինում, ուղղակի երեկ կարծես ակնարկը կոնկրետ անձանց մասին էր: 

-Ժամանակը ցույց կտա՝ դա դեկլարատիվ է, թե ոչ: Իրոք, մենք բոլորս էլ սպասում ենք: Սպասում ենք, որ այդ խոստումները կատարվեն: