Սենցովի մայրը որդուն ներում շնորհելու խնդրանքով դիմել է Պուտինին

Ահաբեկչության մեղադրանքով Ռուսաստանում 20 տարվա ազատազրկման դատապարտված ուկրաինացի ռեժիսոր Օլեգ Սենցովի մայրը դիմել է Ռուսաստանի նախագահ Վլադիմիր Պուտինին՝ խնդրելով ներում շնորհել որդուն, ով մայիսի 14-ից հացադուլի մեջ է: Այս մասին հայտնում է «Ազատություն» ռադիոկայանի ռուսական ծառայությունը:


Ինքը ուկրաինացի ռեժիսորը հրաժարվել է համաներում շնորհելու խնդրանքով դիմել Պուտինին:


Արդեն շուրջ չորս տարի ճաղերի ետևում գտնվող Սենցովին ազատ արձակելու պահանջով աշխարհի տարբեր երկրներում ակցիաներ են կազմակերպվում: Նման խնդրանքով Ռուսաստանի նախագահին է դիմել նաև Եվրոպայի խորհրդի գլխավոր քարտուղար Թորբյորն Յագլանդը: Կրեմլի մամուլի ծառայությունը ի պատասխան հայտարարել է, թե Յագլանդի խնդրանքը չի կարող ինչ-որ գործողությունների համար հիմք հանդիսանալ: