Թրամփը կարծում է, որ Բորիս Ջոնսոնը կարող էր Մեծ Բրիտանիայի համար հրաշալի վարչապետ լինել
Միացյալ Նահանգների նախագահ Դոնալդ Թրամփը կարծում է, որ Մեծ Բրիտանիայի նախկին արտգործնախարար Բորիս Ջոնսոնը կարող էր հրաշալի վարչապետ լինել։ Այդ մասին նա հայտնել է բրիտանական The Sun թերթին տված հարցազրույցում։
«Ես շատ եմ հարգում Բորիսին։ Ես նրան, իհարկե, նույնպես դուր եմ գալիս, նա իմ մասին լավ-լավ բաներ է ասում»,- ասել է Թրամփը, որն աշխատանքային այցով գտնվում է Մեծ Բրիտանիայում։
Հարցին, թե արդյոք Ջոնսոնը կարող է դառնալ կառավարության լավ ղեկավար, Թրամփն ասել է. «Ես չեմ ցանկանում նրանց իրար դեմ հանել (նկատի ունի Ջոնսոնին ու Մեծ Բրիտանիայի ներկայիս վարչապետ Թերեզա Մեյին)։ Ես ընդամենն ասում եմ, որ նա կարող էր հրաշալի վարչապետ լինել»։
Թրամփը դրական է արտահայտվել նաև վարչապետ Թերեզա Մեյի մասին։
«Ոչ, ոչ, ոչ, ես երբեք նրա մասին ոչ մի վատ բան չեմ ասել, դա հորինված լուր է։ Ես կարծում եմ, որ նա հաճելի մարդ է»,- ասել է ԱՄՆ ղեկավարը։
Բորիս Ջոնսոնը հրաժարական է տվել իր պաշտոնից հուլիսի 9-ին՝ Մեյի հետ տարաձայնությունների պատճառով։