Qırımtatarlarnıñ lideri, Ukraina halq deputatı Mustafa Cemilev, Rusiye FSBsi tarafından ekstremizmde qabaatlanğan Cemilevniñ yardımcısı Erol Veliyevge qarşı cinaiy iş, FSB tahqiqatçıları tarafından Qırımtatar Milliy Meclisini itibardan tüşürmek içün uydurıldı, dep iddia ete.
Bunı Cemilev, Veliyevniñ işi boyunca sorğulanğan Ahtem Mustafayevniñ Bağçasarayda tintilüvi ve yaqalanuvını Qırım.Aqiqat muhbiri içün izalarken bildirdi.
Mustafa Cemilev, FSBniñ iddialarına rağmen, yardımcısınıñ Qırım müftisine ait evniñ ateşke berilmesine iç bir alâqası olmağanını ayrıca qayd etti.
Cemilev: «Anda belli bir maqsat bar. Keçken yılnıñ aprelinde Gaaga halqara mahkemesi, Rusiyeni Meclisniñ faaliyetinden, ve menim ile Refat Çubarovnıñ Qırım territoriyasına kirmesinden yasaqnı alıp taşlmağa açıq surette mecbur etti. Rusiye bu maddelerden iç birini yerine ketirmedi. Rusiyeden, nasıl eda eteceksiñiz dep, cevap soraylar. Ve olar, areketlerini aqlamaq içün material toplaylar. Kördiñizmi, olar terrorist eken de, ana ne yapalar, demek içün. Biz yasaqnı iç bir türlü alıp taşlap olamaymız», – dedi.
Bu hususta daa tafsilâtlı şekilde Qırım.Aqiqatnıñ: «Cemilevler ailesiniñ şoförı FSBniñ qolunda ve müftiniñ evini ateşke berüv boyunca iş» materialında oquñız.
İyün 29-da advokat Edem Semedlâyev, iyün 28-de Bağçasaraydaki tintüvden soñ yaqalanğan ve daa soñra sorğulanıp yiberilgen Ahtem Mustafayevniñ, Rusiye FSBsi tarafından ekstremizmde qabaatlanğan Erol Veliyev işi boyunca şaat olaraq keçkenini bilidrdi.
İyün 28-de qırımtatar faaliyetçisi Zair Smedlâyev, Bağçasarayda qırımtatar halqınıñ lideri Mustafa Cemilevniñ apayı Safinarnı taşığan aydavcı Ahtem Mustafayevniñ evi tintilgenini bildirdi. Daa soñra Ahtemniñ telükesizlik hadimleri tarafından belli olmağan tarafqa alıp ketilgeni bildirilgen edi.
Rusiye FSBsi, sanki Qırımda, Ukraina Yuqarı Radasınıñ deputatı Mustafa Cemilevnıñ yardımcısı Erol Veliyev tarafından «Refat Çubarovnıñ emiri boyunca ve SBUnıñ qol tutuvı ile» meydanğa ketirilgen ekstremist gruppasınıñ areketini toqtatqanını, bildirdi.
Rusiyeniñ mahsus hizmeti tarafından iddia etilgenine köre, «Harkivde teşkil etilgen gruppağa Veliyevden ğayrı sabıq boksçu sprotçular Steşenko ve Tretyakov kirdiler».
FSBde, «ekstrimist toplulığınıñ azaları 2018 senesiniñ yanvarinde, tutaştırıcı qarışma ile toldurılğan şişelerni qullanıp, Qırım müftisi Emirali Ablayevniñ evini tutaştırdılar», deyler.
FSB, Steşenkonıñ 2018 senesiniñ aprelinde «Qırımğa kirgende» yaqalanğanını ve «anda Veliyev tarafından provokatsiyalarnı azırlamaq ve amelge keçirmek içün yollanılğanını» bildire. Rusiye Veliyev ve Tretyakovğa qarşı qabaatlavnı ğiyabiy şekilde çıqardı, olar «federal qıdırıluv cedveline kirsetildi».
