Qırımda mahkeme qırımtatar faaliyetçisiniñ anasına qarşı çıqarılğan ükümni quvette qaldırdı
Qırım.Aqiqat muhbiriniñ bildirgenine köre, Kulametova, ükümet vekilini halq ögünde aqaret etüvde (Rusiye Cinayet kodeksiniñ 319-ncı maddesi) qabaatlı tanılıp, 250 saat mecburiy cemiyet işlerinde çalışuv ve zarar körgen polis hadimine tazminat olaraq 20 biñ ruble (8,3 biñ hrivna) ödevge mahküm etildi.
Mahkeme oturışuvı açıq rejimde keçe edi, lâkin zalğa kirmek içün yalıñız beş kişige izin berildi. Aynı zamanda zarar körgen Rusiye uquqqoruyıcı organlarınıñ hadimi oturışuvğa kelmedi.
Qorçalav tarafı, Kremlniñ kontroli altında olğan Qırım Yuqarı mahkemesine bu qararğa qarşı şikâyet bermek niyetinde.
Yanvar 18-de Eski Qırımda tintüvden soñ qırımtatar faaliyetçisi Giray Kulametov yaqalandı. Onı, «ekstremist teşkilâtlarınıñ atributikası ya da simvolikasınıñ propagandası»nda qabaatladılar.
Yanvar 28-de Kulametov, 2012 senesinde içtimaiy ağda videorolikniñ derc etken içün oña ceza olaraq tayin etilgen on künlük apis müddetinden soñ Qarasuvbazar muvaqqat tutuluv izolâtorından çıqtı.
2018 senesiniñ fevralinde onıñ anası Zarema Kulametovanı, hadimlerine «aqaret etken» içün polis bölügine çağırdılar.
Qabaatlavnıñ versiyasına köre, oğlu yaqalanğan künü Kulametova, polis hadimine aqaret etti ve, böylelikle, ayatı ve sağlığı içün telüke doğurdı. Tahqiqatnıñ versiyasına köre, aqaret etilüvden, Rusiye İİNiniñ İslâm-Terek rayonı boyunca polis rehberiniñ muavini Andrey Rogojin zarar kördi.
İlhaqtan soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evleri ketken sayın daa sıq kütleviy surette tintile.