Մեղադրանք է առաջադրվել «Ալո» մականունով «օրենքով գող» Ալեքսանդր Մակարյանին, ով ձերբակալված է
Քննչական կոմիտեի Երևան քաղաքի քննչական վարչության Մալաթիա և Սեբաստիա վարչական շրջանի քննչական բաժնում քննվող քրեական գործով այսօր մեղադրանք է առաջադրվել «Ալո» մականունով այսպես կոչված՝ «օրենքով գող» Ալեքսանդր Մակարյանին:
Այս մասին Tert.am –ին հայտնեց Քննչական կոմիտեի նախագահի խորհրդական Սոնա Տռուզյանը: Մեղադրանքն առաջադրվել է Քրեական օրենսգրքի 268-րդ հոդվածի 2-րդ մասի հատկանիշներով, այն է՝ թմրամիջոցի ձեռքբերում:
Նշենք, որ այս պահին «Ալո» մականունով Ալեքսանդր Մակարյանը ձերբակալված է, վաղը քննարկման առարկա կդառնա դատարանի կողմից խափանման միջոցի ընտրության հարցը:
Հիշեցնենք, որ ոստիկանության քրեական հետախուզության գլխավոր վարչությունում հարուցված քրեական գործի շրջանակներում երեկ՝ հունիսի 20-ին, ոստիկանության մի շարք ստորաբաժանումների ծառայողներ, դատարանի որոշումներով, խուզարկություններ էին կատարում մոտ երկու տասնյակ «օրենքով գողերի» ու քրեական հեղինակություններոի բնակարաններում, այդ թվում՝ «Մանեթի տղա Սամվելիկ» մականվամբ Սամվել Հարությունյանի, «Աֆուլիկ» մականվամբ Ռաֆայել Խոյեցյանի, «Շահումյանցի Ժիրո» մականվամբ Ժիրայր Բրուտյանի, «Լեննականցի Սուրո» մականվամբ Սուրեն Ավետիսյանի, «Լեննականցի Արտյոմիկ» մականվամբ Արտյոմ Ղազարյանի, «Զապ» մականվամբ Անդրանիկ Սողոյանի, «Սևո» մականվամբ Արմեն Մանուկյանի, «Մասիվցի Անդիկ» մականվամբ Անդրանիկ Հարությունյանի, «Ալո» մականվամբ Ալեքսանդր Մակարյանի, «Գորիսեցի Արտեմիկ» մականվամբ Արտեմ Դինունցի, «Օշականցի Գևորիկ» մականվամբ Գևորգ Մելիքյանի, «Քոնչո» մականվամբ Նորայր Փիլոյանի և այլոց:
Սոնա Տռուզյանը հավելեց, որ ներկա դրությամբ ՔԿ-ն ստացել է մեկ գործ՝ Մալաթիա Սեբաստիա վարչական շրջանում հարուցված՝ թմրամիջոցի ապօրինի շրջանառման փաստով:
Հիշեցնենք, որ դեռևս 2011 թ-ին բերման է ենթարկվել «Ալո» մականունով Ալեքսանդր Մակարյանը, որը հանցագործ աշխարհում հայտնի է որպես «օրենքով գող»: Ըստ տեղեկությունների, Ալեքսանդր Մակարյանի մոտ անձնական խուզարկությամբ հայտնաբերվել էր «Դոռռինգե Ֆիե Միամի Ֆլա» տիպի ատրճանակ` լիցքավորված մեկ փամփուշտով: