Ես հստակ կարող եմ հայտարարել, որ Արամ Աթեշյանը պետության դրածոն է․ Կարո Փայլան
Թուրքիայի ընդդիմադիր Ժողովրդադեմոկրատական կուսակցության անդամ, Մեջլիսի հայազգի պատգամավոր Կարո Փայլանը հայտարարել է, որ Պոլսո Հայոց պատրիարքի փոխանորդ Արամ Աթեշյանը համագործակցում է թուրքական իշխանությունների հետ՝ պատրիարքական ընտրությունները խափանելու համար, գրում է Ստամբուլում գործող հայկական պարբերականներից «ՀայԹերթը»։
«Ես երկար տարիներ պայքարել եմ, որ հայ համայնքն ունենա ավելի արդյունավետ կառավարում: Սակայն ամեն անգամ պետությունը փորձել է միջամտել մեր համայնքի ներքին կառավարմանը: Դժբախտաբար, այսօր պատրիարքարանը գրաված անձը պետության դրածոն է: Ես հստակ կարող եմ հայտարարել, որ նա դրածո է և աշխատում պետական ներքին կառույցների հետ պատրիարքական ընտրությունների իրականացմանը խոչընդոտելու համար»,- ասել է Փայլանը:
Ինչպես ավելի վաղ հայտնել է tert.am-ը, Պոլսո Հայոց պատրիարքարանի հոգևոր խորհրդի որոշմամբ՝ Արամ աքեպիսկոպոս Աթեշյանը կշարունակի մնալ Պոլսո Հայոց պատրիարքի փոխանորդի պաշտոնում: Գարեգին Բեկչյանի ընտրությունն ու նրա պաշտոնակալության շրջանում կայացված բոլոր որոշումները չեղարկվել են:
Նման որոշման կրոնական ժողովը հանգել է օրերս Ստամբուլի նահանգապետարանում Թուրքիայի ներքին գործերի նախարար Սուլեյման Սոյլուի և պատրիարքի ընտրությունների կազմակերպմամբ զբաղվող նախաձեռնող խմբի անդամների ու հայ համայնքի հիմնադրամների ղեկավարների մասնակցությամբ արտահերթ ժողովից հետո:
Ավելի վաղ Ստամբուլի նահանգապետարանի հրավիրած արտահերթ ժողովում պատրիարքի ընտրությունների կազմակերպմամբ զբաղվող նախաձեռնող խմբի անդամների և հայկական հիմնադրամների ղեկավարների ներկայությամբ պաշտոնապես հայտարարվել էր, որ ավելի քան 9 տարի կոմայի մեջ գտնվող պատրիարք Մեսրոպ Մութաֆյանի կենդանության օրոք որևէ նոր ընտրության հայ համայնքին գնալ չի թույլատրվի և որ պետությունը հավատարիմ է մնալու իր՝ 2010 թվականին Նախարարների խորհրդի կողմից Արամ Աթեշյանին պատրիարքի փոխանորդ կարգող որոշմանը: