Եթե սիրիական բանակը հարվածի Իդլիբին՝ Թուրքիան կլքի Աստանայի բանակցությունները․ Չավուշօղլու
Թուրքիայի արտաքին գործերի նախարար Մևլութ Չավուշօղլուն հայտարարել է, որ եթե Սիրիայի իշխանական ուժերը հարձակում գործեն Իդլիբի վրա՝ Թուրքիան կլքի Աստանայում Սիրիայի հիմնախնդրի շուրջ բանակցային գործընթացը, գրում է «Բիրգյուն» պարբերականը։
«Եթե ռեժիմը հարվածի Իդլիբին՝ մենք կլքենք Աստանայի բանակցային գործընթացը։ Իրանին և Ռուսաստանին արդեն զգուշացրել ենք այդ մասին»,- ասել է Չավուշօղլուն։
Իդլիբում գլխավորապես կենտրոնացած են զինված ընդդիմադիր և ջիհադական խմբավորումները, որոնց մեծ մասը վայելում է Թուրքիայի աջակցությունը։
Թուրքիայի արտգործնախարարը խոսել է նաև Մանբիջի մասին՝ հավաստիացնելով, որ քուրդ զինյալները հուլիսի 8-ից պետք է սկսեն դուրս գալ տարածքից։
Հիշեցնենք, որ օրեր առաջ թուրքական ԶՈւ-ն անցել է սիրիական Մանբիջի հետ կապված՝ ԱՄՆ-ի հետ ավելի վաղ համաձայնեցված գործողությունների իրականացմանը։
Ավելի վաղ սիրիական Մանբիջում համատեղ գործողությունների ծրագրի շուրջ աշխատող թուրք-ամերիկյան աշխատանքային խումբը վերջնական համաձայնության է եկել «ճանապարհային քարտեզի» վերաբերյալ ու համաձայնել համապատասխան փաստաթուղթն ուղղել երկու երկրների պետական բարձր մարմիններին։