Eski Qırımda tintüvden soñ yaqalanğannıñ aqrabaları FSBge çağırıldı
«Tünevin anasına FSBden telefon açtılar. Onı ve meni iyün 14-te, yanımızğa vesiqalar alıp, FSBniñ Aqmescitteki bölügine kelmekni rica ettiler. Ne maqsatnen bildirmediler. Bunıñ kibi de, Abdurahmannıñ bulunğan yeri ve oña sıñırlav tedbiri tayin etildimi, yoqmı, bildirmediler. İhtimal ki, yarın er şeyni añlatırlar», – dedi o.
Daa evel, Abdurahman Rustamovnıñ aqrabaları onıñ bulunğan yerini tayin etip olamaylar, dep bildirilgen edi.
Rustamovnıñ vatandaş ömür arqadaşı, iyün 7-de aqayına sıñırlav tedbiri tayin etilmek kerek olğanını bldirdi. Qadınnıñ aytqanına köre, oña mahkeme ne zaman olacağını bildirmek kerek ediler, lâkn o, bu malümatnı öyle de almadı. Rusiye mahkemesinde onıñ telefon etmelerine kimse cevap bermedi.
İyün 6 sabasında Eski Qırımda Rusiye telükesizlik hadimleri tarafından bir ev tintilgen soñ bir erkek yaqalandı. Daa soñra, iyün 7-de Kremlniñ kontroli altında olğan Kiyevskiy rayon mahkemesinde oña sıñırlav tedbiri tayin etilmek kerek, degen haber alındı.
Rusiye telükesizlik müessiseleri tarafından bu hususta açıq menbalarda izaat berilmedi.
Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.