Եթե նկարներիս մեջ ինչ-որ բան էքսցենտրիկ է, ուրեմն դա իրոնիա է` այդ ժամանակահատվածում ինչ-որ երևույթի նկատմամբ. ԲՈՀ-ի նորանշանակ նախագահ (լուսանկարներ)
Tert.am -ի հետ զրույցում ԲՈՀ նորաշանակ նախագահ Սմբատ Գոգյանն անդրադառնում է համացանցում իր մի փոքր էքսցենտրիկ լուսանկարներն, տարվելիք կադրային քաղաքականությանը և այլ հարցերի:
-Պարո՛ն Գոգյան, այսօր առաջին անգա՞մ գնացիք աշխատանքի, ընդունեցի՞ք պաշտոնը:
-Այո՛, այսօր նոր ժամանեցի: Եկա, ընդունեցի, տնօրենն էր, նախագահը չկար (նախկին նախագահը – խմբ.):
-Այսինքն՝ Լիլիթ Արզումանյանը ներկա չէ՞ր:
-Ո՛չ, ինքը առավոտյան իրերը հավաքել, գնացել էր:
- ԲՈՀ-ն առողջացնելու Ձեր տեսլականը ո՞րն է:
-Եկեք, 1 շաբաթից խոսենք, թե իմ առաջին քայլը որն է եղել կամ լինելու:
-Որպես ռազմավարություն՝ աչքի առաջ ունե՞ք հեռանկար, որ, օրինակ՝ նախկին պաշտոնյաների ատենախոսությունները այլևս հաստատված չհամարվեն: Ի վերջո, մամուլում բազմաթիվ հրապարակումներ են եղել այն մասին, թե ինչպես են Հայաստանում պաշտոնյաները պաշտպանել թեկնածուական թեզեր:
-Ո՞նց են պաշտպանել որ:
-Դե, այսպես ասած՝ գրել էին տալիս լավագույն դեպքում:
-Դա մենք բոլորս գիտենք, բայց քանի դեռ հստակ չգիտենք՝ ինչ է եղել, չեմ կարող ոչինչ ասել:
-Այսինքն՝ բարձրացնելո՞ւ եք այդ ատենախոսությունները դարակներից:
-Փորձելու եմ հասկանալ՝ ինչն է օրինական կատարվել, ինչը՝ ոչ: Ու եթե անօրինական կատարված բաներ կան, փորձելու ենք ուղղել:
Լինելով Պետհամալսարանում մասնագիտական խորհրդի անդամ՝ անօրինակություն չեմ տեսել խորհրդի աշխատանքում: Դրա համար հասկանալու, թե կեղծիքներ եղել են, թե ոչ, ժամանակ է պետք:
-Խոսքը հիմնականում ԲՈՀ-ի կողմից չհաստատված պլագիատների մասին է:
- Նախ նշեմ, որ գոյություն ունի համակարգ, որը գտնում է (աշխատանքները գրագողություն են այլ հեղինակից, թե ոչ-խմբ.), հիմա հարց է՝ չեն ուզում այդ համակարգը գտնի, թե գտնում է, չեն արձագանքում:
-Չէ, հարցս այն մասին է, որ որոշ ատենախոսություններ, կոպիտ ասած, անվավավեր համարվեն:
-Ես չգիտեմ՝ իրավական դաշտում էլ է պետք ամեն ինչը հասկանալ:
-Աշխատանքից ազատելո՞ւ եք նախկիններին:
-Միանշանակ, ոչ:
-Բացի այն, որ բավականին երիտասարդ տարիքում պաշտպանել եք ատենախոսություն, հայտնի եք համացանցում Ձեր մի փոքր էքսցենտրիկ լուսանկարներով. մի տեղ խորհրդանշում եք Մահը, մեկ այլ տեղ Նացիստական նշաններով եք:
-Նացիստական նշանով նկարը ֆոտոշոփով արված է, իրականությանը չի համապատասխանում: Ես նացիստական շորեր երբեք չեմ հագել: Իսկ որ ասոմ եք՝ էքսցենտրիկ նկարների պակաս չունեք, իրականում ունեմ. ողջ կյանքում մի քանի հատ ունեմ (խմբ- նման նկար): Բայց ո՞րը նկատի ունեք՝ 2 հատ հեծանիվ քշե՞լը: Եթե այո, պատմեմ: Հիշում եք՝ մի քանի տարի առաջ Ժան Կլոդ Վանդամը 2 բեռնատարի վրա միաժամանակ նկարվել էր: Հիշո՞ւմ եք:
-Մոտավոր, աղոտ մի բան հիշում եմ:
-Այ, եթե որոնեք, նայեք, կհասկանաք՝ ինչու եմ այդ նկարը արել: Եթե թվում է՝ ես «Համմեր» եմ սիրում, դրա համար 2 հատ հեծանիվով «Համմեր» եմ նկարում, դա այդպես չէ: Փորձեք գտնել մի հատ շքեղ մեքենայի մոտ իմ նկար, կամ ինչ-որ շքեզ հարսանիքի նկար, կամ ինչ-որ շքեղ հագնված նկար: Սովորական կյանքով ապրում եմ, համեստ կյանքով ապրող մարդ եմ:
-Այսինքն՝ ուզում եք ասե՞լ, որ կարևորը քաղքենի չեք, իսկ եթե էքսցենտրիկ են …
-Եթե իմ նկարների մեջ ինչ-որ բան էքսցենտրիկ է, ուրեմն ինքը իրոնիա է՝ այդ նկարը նկարահանելու ժամանակահատվածում ինչ-որ մի երևույթի նկատմամբ:
-Իսկ այդ Մահի նկարն ի՞նչ է խորհրդանշում:
-Ի՞նչ մահ:
-Մի նկար ունեք, կարծես, մահը մարմնավորեք:
-Գերանդիով նկարը: Լաստիվեր էինք գնացել, անձրև էր գալիս, գլխարկներ էինք վերցրել, այնտեղ գերանդի կար, վերցրեցի՝ տեղը դնեմ, կողքիս աղջիկներ կային, ասաց՝«ոնց որ Մահը լինես, արի նկարվենք», նկարվեցի:
-Հիմա, երբ այլևս պաշտոնյա եք, ԲՈՀ-ի նախախագահ, մտադիր չե՞ք հանել այդ նկարները համացանցից:
-Դա իմ անձնական կյանքն է, ես դրանից երբեք չեմ նեղվում: