Makedoniya və Yunanıstan 27 illik ‘ad mübahisəsində’ razılığa gəliblər
Makedoniyanın baş naziri Zoran Zaev iyunun 12-də deyib ki, Afina və Skopye arasında əldə olunmuş razılaşmaya əsasən, indiyədək Makedoniya kimi tanınan ölkənin adı Şimali Makedoniya Respublikası və ya makedoniya dilində Severna Makedoniya olacaq.
Bu mübahisənin başa çatması o deməkdir ki, Şimali Makedoniyanın NATO və Avropa İttifaqına üzvlüyü üçün maneə aradan qalxır, beləki hər iki blokun üzvü olan Yunanıstan Makedoniya adlı ölkənin bu təşkilatlara üzvlüyünü bloklayırdı.
Zaev mətbuat konfransında deyib ki, yeni ad Makedoniyanın etnik və mədəni identikliyini ehtiva edir.
Lakin o bunu da əlavə edib ki, yeni ad Makedoniyada referenduma çıxarılacaq.
Yunanıstanın baş naziri Alexis Tsipras deyib ki, yeni ad Yunanıstanın Makedoniya vilayəti ilə ölkə adının arasında aydın sərhəd qoymuş olur.
NATO-nun baş katibi Jens Stoltenberg bu “tarixi razılaşmanı” alqışlayıb və hər iki tərəfi sazişi yekunlaşdırmağa çağırıb.
O deyib: “Bu Skopyeni NATO üzvlüyü cığırına çıxarır və üstəlik bütün Qərbi Balkanlar boyunca sülh və sabitliyə xidmət edəcək”.
Avropa İttifaqı da Tsipras və Zaevi onların “tarixi razıalşmanı əldə etmək üçün göstərdikləri qətiyyət və liderliklərinə görə” təbrik edib.
Avropa İttifaqının xarici işlər komissarı Federica Mogherini və Aİ-nin genişlənmə üzrə komissarı Johannes Hahn-ın birgə bəyanatında deyilir: “Biz indi gözləyirik ki, Avropa Şurası iyun ayında Makedoniya Keçmiş Yuqoslaviya Respublikasının ittifaqa qəbulu istiqamətində danışıqlara başlanması üçün 17 aprel tarixli tövsiyəmizi qəbul edəcək”.
Afina və Skopye arasında Makedoniya adı üstündə mübahisə 1991-ci ildə Makedoniya dinc şəkildə Yuqoslaviyadan ayrılan vaxtdan başlanıb.
O vaxtdan bəri Afina Makedoniya adına etiraz edərək bildirir ki, bu onun vilayətlərinfən birinin adıdır və beynəlxalq birlikdə dolaşıqlıq yaradır.
Yunanıstanın ad etirazına görə Makedoniya BMT-yə də keçid ad – Makedoniya Keçmiş Yuqoslaviya Respublikası adı ilə qəbul edilib.