Presidenti i Afganistanit, Ashraf Ghani, shpalli armëpushim me kryengritësit talibanë nga data 12 deri më 20 qershor, kur të kenë përfunduar edhe Muaji i Ramazanit dhe Festa e Bajramit.
Ghani i bëri këto komente në një video-mesazh të publikuar të enjten, por nuk është ende e qartë nëse militantët e kanë pranuar armëpushimin.
Ghani tha se forcat afgane të sigurisë “do t’i ndalojnë ofensivat” kundër talibanëve, por do të vazhdojnë të godasin grupin militant Shteti Islamik, Al Kaidën dhe “grupet e tjera terroriste ndërkombëtare”.
Armëpushimi është “një mundësi për talibanët të shohin se fushata e tyre e dhunshme nuk po i fiton zemrat dhe mendjet e afganëve, por po i largon ata nga kauza e tyre”, shkroi Ghani në Twitter.
“Me njoftimin për armëpushim, ne mishërojmë forcën e Qeverisë afgane dhe dëshirën e popullit për zgjidhje paqësore të konfliktit në Afganistan”, tha Ghani.
Zëdhënësi i talibanëve, Zabihullah Mujahed, nuk pranoi ta komentojë këtë çështje për Radion Evropa e Lirë.
Njoftimi i Ghanit u bë pak ditë pasi mekanizmi më i lartë fetar i Afganistanit lëshoi një fatwa, apo urdhër fetar, që, nën parimet e Islamit, sulmet vetëvrasëse i shpall të ndaluara, ose haram.
Në takimin në Kabul, më 4 qershor, Këshilli Ulema i Afganistanit po ashtu u bëri thirrje forcave qeveritare afgane dhe talibanëve dhe grupeve të tjera militante që të pajtohen për armëpushim dhe për negociata për paqe.
Një sulm vetëvrasës jashtë këtij takimi që u ndoq nga rreth 2,000 klerikë myslimanë, dijetarë dhe autoritete të tjera nga i gjithë Afganistani, la të vrarë së paku shtatë njerëz, përfshirë disa klerikë.
Një degë lokale e Shtetit Islamik e mori përgjegjësinë për sulmin.
Qeveria afgane, e mbështetur nga Perëndimi, po përpiqet të luftojë talibanët dhe grupet e tjera militante që nga tërheqja e shumicës së trupave të NATO-s në vitin 2014.
Talibanët i kanë shtuar sulmet ndaj forcave afgane të sigurisë dhe zyrtarëve qeveritarë anembanë vendit prejse kanë shpallur ofensivën pranverore në muajin prill.
Në muajin shkurt, Ghani u ka ofruar talibanëve të shndërrohen në parti politike dhe ka thënë se do të punojë për heqjen e sanksioneve kundër tyre, nëse i bashkohen qeverisë në negociatat për paqe.
Në këmbim, militantët do të duhet të njohin Qeverinë e Kabulit dhe të respektojnë sundimin e ligjit, por ata nuk e kanë pranuar ofertën.
Presidenti i Shteteve të Bashkuara, Donald Trump, gushtin e kaluar, ka shpallur strategji të re për Afganistanin, duke i shtuar edhe sulmet ajrore, me qëllim detyrimin e talibanëve që të marrin pjesë në tryezën e negociatave.
Përgatiti: Valona Tela