Эр хотинининг ўзига нисбатан садоқатини текшириб кўрмоқчи бўлди-ю… (видео)
Бундан икки йил олдин «YouTube» каналида ғалатомуз ролик пайдо бўлганди. Бу роликни Қирғизистоннинг Ўш вилоятилик Эрлан Илёсов ва Қанот Шарипбековлар суратга олишган.
Видеоролик сюжети қуйидаги мазмунга эга.
Эр хотинининг садоқатини амалда синаб кўриш учун ташқарида юрганидан фойдаланиб, қоғозга ортиқ у билан бирга яшай олмаслигини, ажрашишга қарор қилганини, шунинг учун уйдан кетишини қисқа сатрларда ёзиб қолдирди. Ўзи эса каравот остига беркиниб, хотинининг реакциясини кута бошлади.
Хотини уйга кирди. Кўзгу қаршисига борди. Дафъатан мактубга кўзи тушди-ю, ўқиб чиқди ва қўлига ручка олиб нималарнидир ёзган бўлди-ю, телефонини олиб кимгадир қўнғироқ қилиб деди:
— Азизим, ишонасизми, ўзи кетди! Нима қилиб шунга турмушга чиққан эканман! Майли, энди афсусланмайман! Сиз борсиз-ку! Ҳозир бир неча дақиқада ёнингизга етиб бораман!..
Эр бу гапларни эшитгач, бўларича бўлганди. Хотини кийимини алмаштириб чиқиб кетиши билан жонҳолатда каравот остидан чиқди-да, қўлига жавоб мактуби битилган қоғозни олди. Унда қуйидаги сўзлар битилганди:
— Беркинган одам тузук-қуруқ беркинади-да! Каравот остидан оёғингиз чиқиб турибди-ку! Мен нонга чиқиб кетяпман! Тез келаман!..
Ана сизга садоқат-у, ана сизга аёлнинг ҳийласи! Азизлар, ёстиқдошларимизга, дардкашларимиз бўлмиш турмуш ўртоқларимизга ишонайлик! Шундагина оилавий ҳаётимизда мазмун бўлади!..
Дарвоқе, ўша видеоролик икки йил ичида 25 миллиондан кўпроқ томошабин йиғибди.
Манба: Hordiq.uz