Газа секторындағы қақтығыстан ондаған адам өлді
Газаның денсаулық сақтау министрі наразылық шарасы кезінде оқ-дәрі, көзден жас шығаратын газдан 2700 палестиналықтың жарақат алғанын айтып, бұл 2014 жылдан бергі Газа соғысындағы қанға боялған ең ауыр күн деп мәлімдеді.
Ал Израильдің айтуынша, Газа шекарасындағы “тәртіпсіздік шарасына” 40 мың палестиналық қатысқан. Күштік құрылымдарды қорғай сөйлеген елдің премьер-министрі Биньямин Нетаньяху “әрбір ел өзінің шекарасын қорғауға міндетті” деп мәлімдеген.
Палестина автономиясының басшысы Махмуд Аббас Израиль әскерінің жасаған “қанды қырғынын” айыптап, үш күндік қаралы күн жариялады.
БҰҰ-ның адам құқықтары бойынша жоғары комиссары Зейд Раад әл-Хусейн Израиль әскери күштері тарапынан жасалған “адам құқығының өрескел бұзылуын” сынады.
14 мамырда Иерусалимде АҚШ елшілігінің ашылу салтанаты өтті. Оған Ақ үйдің жоғарғы кеңесшісі, АҚШ-тың Таяу Шығыстағы арнайы елшісі әрі Дональд Трамптың күйеу баласы Джаред Кушнер қатысқан.
АҚШ президенті Дональд Трамп былтыр Вашингтон екіге бөлінген Иерусалимді Израиль астанасы деп танитынын және АҚШ елшілігін Тель-Авивтен осы қалаға көшіретінін жариялаған. Бұл шешім Вашингтонның Палестина-Израиль проблемасына қатысты саясатын өзгерте бастағанын білдірген.
Палестиналықтар Шығыс Иерусалим өздерінің болашақ мемлекетінің астанасы болғанын қалайды. Израиль Шығыс Иерусалимді басып алып, қаланы өзінің астанасы деп жариялаған. Халықаралық қауымдастық Тель-Авивтің бұл әрекетін құптамайды.